Guovdageainnu faláštallansearvi dieđiha ahte eai sáhte lágidit čiekčamiid go eai leat nákcen háhkat doarvái duopmáriid.
Boahtte vahkkoloahpa galggai Ávvir Cupa lágiduvvot Guovdageainnus, muhto čiekčamat leat šluhttejuvvon.
– Dađi bahábut šaddat šluhttet dán jagi čiekčamiid. Mii leat viggan ohcat duopmáriid, muhto dainna eat leat lihkostuvvan. Mii váldit oktavuođa buot joavkkuiguin mat leat máksán dieđihandivvaga, ruđat máhcahuvvojit nu jođánit go vejolaš, čállá lágideaddji Guovdageainnu faláštallansearvvi senioraid spábbačiekčanjoavku Facebookas.
Lágideaddjit dieđihit ahte sis váilot unnimusat njeallje duopmára ja ahte sis maiddái leat unnán eaktodáhtolaš bargit.
Ávvir ii leat ožžon lágideddjiid ságaide.
