-Almmuhus-
-Almmuhus-
ÁVVIR CUP 2019Ávvir Cup čievččas­tuvvo fargga johtui 

Ávvir Cup čievččas­tuvvo fargga johtui 

-

-

Guovdageainnu nuorra spábbačiekčit deaivvadit vuosttaš čiekčamis Ávvir Cupas go Wunderbaums ja Lubben Ballklubb čievččastit johtui vuosttaš Ávvir Cupa. Ávvir sádde njuolggosáddaga Báktehárjjis olles vahkkoloahpa.

Báktehárjjis Guovdageainnus diibmu 18 bearjadaga čievččastuvvo vuosttaš Ávvir Cup johtui, ja Ávvir lea gearggus sáddet njuolggosáddaga olles vahkkoloahpa. Bearjadaga besset geahččit oaidnit sihke Guovdageainnu, Kárášjoga, Álttá, Skániid ja Romssa joavkkuid čiekčamin go logi čiekčama galget čađahuvvot. 

Ávvira áššedovdi

Aslak Anders Gaino, gii lea jođihan Nagirváre lunttaid, Nagirváre reaŋggaid ja Nagirváre nieiddaid nuppelot jagi Nilut Cupas, mii loahpahuvvui diibmá, lea mielde sáddagis áššedovdin. Son jođihii Nagirváre lunttaid go vuite Nilut cupa, nu ahte Gainos lea buorre gealbu ja máhttu futsal suorggis. 

Dál son illuda geahččalit nuppe bealde šilju čuovvut čiekčamiid.

– Mun jáhkán ahte lea hui ártet go in leat jođiheamen ovttage joavkku go nu ollu jagiid lean leamaš mielde. Mun lean oktii ovdal leamaš mielde kommenteremin, dalle go allaskuvlla studeanttat lágidedje rávdnjema, de ledjen mielde kommentáhtorin, muitala Gaino ja dadjá iežas jođánit nagodit oaidnit mo joavkkut čikčet, leat go buorit čiekčit ja guđelágan čiekčit leat šiljus. 

ÁŠŠEDOVDI: Ávvira áššedovdi Ávvir Cupas lea Aslak Anders Gaino, gii earret eará lea jođihan Nagirváre lunttaid vuoitit Nilut cupa, Sámi cupa ja Førjulsturneringa Kárášjogas. Govven: Sárá Máret Rávdná Oskal (Vuorkágovva)
ÁŠŠEDOVDI: Ávvira áššedovdi Ávvir Cupas lea Aslak Anders Gaino, gii earret eará lea jođihan Nagirváre lunttaid vuoitit Nilut cupa, Sámi cupa ja Førjulsturneringa Kárášjogas. Govven: Sárá Máret Rávdná Oskal (Vuorkágovva)

Áššedovdi árvvoštallan

Ávvir sihtá Gaino árvvoštallat joavkkuid daid namaid vuođul mat leat almmuhuvvon dán rádjái ja son lea jođán válljet oiddohiid nissonolbmuid bealis. Son čujuha seamma jovkui go čiekčanjođiheaddji Svein Ole Sandvik, namalassii PSG

– Nissoniid bealis jáhkán mun ahte PSG ja Buldoser deaivvadit finálas ja ahte PSG vuoitá nu go lea ovdal ge dahkan, muhto dievdduid bealis gal lea váddásit. Dán jagi orrot hui ollu joavkkut mat leat dássálaga, dadjá Gaino.

Rabas dievdduid bealde

Dievdduid bealde, mas leat golbma puljja, sihtá Ávvir Gaino árvvoštallat juohke puljja ja geahččat guđe joavkkuid jáhkká dahkat bures. Son lea jođán vástidit ahte Skániid joavku lea álo okta oiddohiin vuoitit go bohtet Guovdageidnui. Nuppi ja goalmmát puljjas gal árvvoštallá šaddat eambbo dássálaga. 

– Mun dieđán gal ahte mu olmmái, Roger Boltås (Skániid joavkojođiheaddji), ii boađe heajos joavkkuin Guovdageidnui. Mun árvvoštalan sin oiddohin vuoitit vaikko in dieđe makkár čiekčit sis leat mielde. Nuppi puljjas mun lean eahpesihkar go doppe leat guokte joavkku mat mu mielas leat gelddolaččat ja dássálaga. Kaffe & Sigg FC joavkkus leat muhtin čiekčit geat ovdal leat leamaš mielde Nagirváre reaŋggaid joavkkus ja sin mun dieđán leat buorit. Team Shalabajs lea maid hui somás joavku geat moadde jagi jo leat čiekčan fárrolaga. Dan joavkkus leat nuorra Kárášjoga lunttat geat diimmážii ledje ovdánan ollu ja dál jáhkán sin vel buorebun. Illudan sin čuovvut, dadjá Gaino. 

Riikajoavkku čiekči

Goalmmát puljjas, man čiekčanjođiheaddji Sandvik dajai garra puljan gávdno Norgga futsal riikajoavkku čiekči. Sambaklubben Smikkesmukk, mii ovdal lea guovtte geardde boahtán goalmmádin Nilut cupas, váldá dán ge jagi riikajoavkku čiekči Jonas Nikolaisen Simonsena mielde Guovdageidnui.  

– Goalmmát puljjas leat buorit joavkkut, muhto mun jáhkán ahte Sambaklubben Smikkesmukk vuoitá puljja. Lean sihke oaidnán sin ja deaivvadan singuin ja sii leat maid leamaš hui dássálaga mu joavkkuin Nagirváre lunttaiguin, nu ahte sii gal leat buorit, dadjá Gaino ja namuha maid riikajoavkku čiekči:

– Sis lea mielde riikajoavkku čiekči Jonas Simonsen, gii lea hui buorre futsal-čiekči. Ii son duššiid dihte gal leat beassan riikajovkui, loahpaha Gaino. 

Ávvir ii leat ožžon Simonsena ságaide, muhto mii geahččalit su oažžut mielde njuolggosáddagii. 

-Almmuhus-