Nu go ovddit jagiid, de lea Ávvir dán jagi maid ožžon veahki árvvoštallat Sámi Grand Prix juoiganoasi.
Ávvir lea ožžon veahki hárjánan juoigis, Biret Ristin Saras, árvvoštallat dán jagáš luđiid ja juigiid. Dán jagi lea árvvoštallan čállon almmuhuvvon luđiid vuođul, muhto Sara ii leat čuvvon generálageahččaleami ja árvvoštallan luđiid dan ektui.
Árvvoštalli deattuha ahte go juoigit lávkejit lávddi nala, de sáhttá ollu ain rievdat.
Johan Anders Bær – «Per Heimly/Heimly Piera»
Siivvožit manada luohti, go guhkes mohkiid vatnalahttá ja čábbát govvida luđiin.
Orru álkes luohti, muhto lea gáibideaddji oažžut teknihkalaččat doaibmat bures, muhto dan gal juoigi diehttalasat hálddaša, go dat lea su iežas juoiganvuohki.
Dajahus boahtá vuohkkasit, ja dan bokte hervejuvvo luohti eanet.
Dát luohti soaitá boahtit bajimusaid searvái.
Inger Marie Nilut – «Ovl`Ovl`Ovllá»
Dán luođis lea eanet trøhkka go earáin dán jagáš gilvoluđiin.
Šearu jienain juoiggada. Dajahus maid gullosta, vaikko ii nu ollu. Dološ árbemállet luohti dat lea. Go álggu gulat, de dieđát mo luohti manada, go lea álkes luohti fáhtet.
Gii dološ juoiganvuogi luđiide liiko, de jáhkášin dán luođi boahtit bajás.
Máhtte Ánte J. Sara – «Sildda áldu»
Ráfálaččat fal luohti manada, ii ge jáhkášii ahte lea oarjjabeale luohti, go gullá melodiija struktuvrra.
Dássedis jienain juoiggada mii doalahuvvo miehtá luođi. Ii dajahus gal leat eanet go mii luođi namma lea. Jaskkodat go gulat luođi. Dat leat vissa ráfálaččat dat Silddá álddut, nu go dajahus lea. Jietnateknihkka ii fal nu olus gáibit juoigis, go ahte doalaha luođi álggus lohppii. Ii dat leat jiena dáfus nu hearvái.
Ii gáibideaddji luohtebealljái čuoza nu ahte jáhkášii dán boahtit nu bajás.
Jørgen Stenberg – «Skilgget»
Álggus juo gullá áhte luohti doalvu du jietnahervejuvvon báikkiide, muhtin saje siivvut ja dasto jitnosit. Nu ahte várut fal gosa rohtte, ja nu vuorddekeahttá.
Stuorra variašuvdna jietnageavaheamis, go ravggoda duon dán guvlui duokkot dákko, go juoiggada. Jietna guoddá hui roahkka luođi intensitehta. Oadjebasat fal juoiggada, ja dovdo lea hárjánan, go roahkka buokčala dakkár erenoamáš jietnahervejuvvon šuoŋaide ja jietna guoddá vaikko duoddarii.
Várra gáibida eanebuš guldaleaddjis hálddašit dánlágan juoigama.
Sara-Elvira Kuhmunen – «Čuvggodit»
Litna, čuvges jienain livdeda ráfálaš luođi.
Siivvožit juoiggada, fáhkka boahtá mohkki mii manná hui bajás. Dakkár luohti mainna olmmoš ráfo, mas sánit gal eai gullos. Muittuha sakka dáláš áigge juoigama, mas eanet jietnageavaheapmi lahkona lávluma.
Luohtebálggis doalvu guldaleaddji sáhkkiivuođa gullat makkár boahtte mohkki lea, oainnat dan ii sáhte nu diehttalasat árvidit. Juoiggus lea dego sielu dálkkas, ráfálaš máilmmis beaivvádagas.
Áilloš – «John Mathias Gaup»
Stuorralágan luohti dan snáhppilis juolggážis, man ii sáhte diehtit man stuoris son leaš.
Ravggodeaddji movttegis luohti, go duokkot dákko botkestallá nuohttamohkiid, hárjánan juoigi.
Dát lea čielga oarjjabeale luohtemálle. Son fal hálddaša iežas guovllu juoigama, ja luođis gullosta vuogas dajahus, mii lokte luođi ja bidjá dasa leavttu.
