Ávvir árvvoštallá dán jagi SGP oasseváldiid luođis luohtái ja lávlagis lávlagii.
Dál lea Sámi Grand Prix 2017 álgán.
Álggos guoimmuha Lars Heaika Blind, luđiin.
Dasto guoimmuha ges Ingá-Máret Gaup-Juuso.
Dán jagi leat Sámi ofelaččat prográmmaláidesteaddjit, juoiganoasi láidesteaba Oda Kjær Eriksen ja Knut Mikkel Hætta.
Juoiganoasi lea juoigi Biret Ristin Sara árvvoštallan Ávvira ovddas.
(Buot govat leat govvejuvvon generálageahččaleamis)
1. Kim Hallgeir «Hálgon» Berg, luohti: «Nils Olav»
Orro hui bures hárjánan leat lávddi alde, hui vuohkkasit lihkadii luođi mielde.
Vuovdnás čáppa luohti, lihkku Nils Olavas go oaččui nie čáppa luođi.
Veahá gal dovdui balus lávddi alde, go šattai fáhkka loahpahit.
Ledje veahá dajahusat, vuohkkasit heivejedje luohtái.
Su jáhkán leat favorihtaid searvvis.
2. Máhtte Ánte J. Sara, luohti: «Elle Sofe»
Dovdui ahte ii leat juoigan lávddi alde ovdal, ii soaitte diehtit nu justa mo dan lávddi galgá deavdit.
Bođii measta dakkár dovdu ahte luohti ii vuolgán johtui, dego vurden goas dat ealáska dat luohti.
Vurden eambbo dan juoigis, ii ožžon luođi ealáskit.
Vurden eambbo oaidnit dan olbmo gean juoigá luođis, muhto ii orron nagodeamen luđiin govahallat su vaikke dajahalai gal.
3. Inger Marie Eira Gaup, luohti: «Sandra Marie»
Hirbmat buorre jietna, muhto dovdui balus.
Dološmállet luohti, bures son gal dovdá dieđus luođi gal.
Lei soaitit sáhttit eambbo dan lávdeláhttema jurddašit, vai ii leat dušše ieš okto lávddis muhto gehččiiguin maid oažžu oktavuođa.
Finálas manai buorebut go generálageahččaleamis.
4. Jan Ole Hermansen, luohti: «Per Jonah»
Hui somás luohti, juoiggai ja de bođii vel dakkár mohki mii manná hui alladit.
Erenoamáš luohti, mii dagahii ahte vurden dan alla mohki.
Ii orron balus lávddis.
Su maid jáhkán leat favorihtaid searvvis go vuoiti galget válljet.
5. Mihkkal Ante Oskal, «Ailu»
Nuoramus juoigi. Lei veahá ruostajietna, in dieđe leago nuorvu vai badjelmeare hárjehallan.
Hui somá gullat nuorra juoigi, veahá dajahalai maid.
Dovdui maid ahte ii leat nu hárjánan lávddi alde juoigat.
Dološmállet luohti, albma luohti, ii boahtán dat dovdu ahte dat lea «konstruerejuvvon» muhto lei hui lunddolaš luohti.
Erenoamáš čáppa luohti.
6. Inger Marie Nilut, luohti: «Ánte Ovlla»
In dieđe leago bárdni jo ollesolmmoš, muhto lei hui álkes luohti, gehppes luohti, ii leat mohkkái.
Dajahalai vuohkkasit orohagaid, báikkiid ja johttimiid, gullui ahte lei badjeolbmo luohti.
Ii lean dakkár «wow-vásáhus», dakkár dego veahá ravgestallá.
Dakkár luohti man álkit oahppá ja álkit čuovvola.
7. John André Eira, luohti: «Svein Egil»
Albmás lea buorre jietna, bures juoigá ja dajahallá.
Dien luođis lei maid dakkár hui erenoamáš mohki, duođaid dakkár mas smávva «seaibegeažit» šleaŋgájit vel.
Muhto ii dát luohti ge lean dakkár wow-vásáhus, muhto aibbas ok.
Finálas orui eambbo balus go generálageahččaleamis.
8. Anders Isak Oskal, luohti: «Mihkkal Issát»
Dološmállet luohti, somá lei gullat ja lei dakkár luohti masa in gallánan dien oanehis bottas.
Lávddi alde son čohkkái láhttis duollji alde, dat dagahii dađi bahábut ahte son measta dego jávká lávddi alde.
Jietna gal gullo, muhto ožžon dakkár dovddu dego son livččii lávus juoiggadeamen.
Lei juollot čuoččastit maid, iige čohkkát olles áigge, dalle livččii maiddái gievrrat juoigat.
Muhto juoiggai bures.
9. Marit Kristine H. Sara, luohti: «Nils Ante»
Hui hárjánan lávddi alde juoigat, dovdo ahte lea ovdal juoigan ja vuoitán maid.
Muhto sus jietna measta ii guoddán daid alimus mohkiid, ja dat bilidii veahá su ovddas.
Iešalddis hui buorre luohti, muhto guldalettiin de jurddašin ahte ii nagot dien alla mohki, ja orui dego ieš maid várohallamin dan.
Livččii sáhttit leat maid favorihtaid searvvis, jus dien alla mohki lei nagodit buorebut.
Finálas juoiggai buorebut go generálageahččaleamis.
10. Johán Ivvár Gaup, luohti: «Mirja Karita»
Hui guhkes nuohtat dan luođis, guhkás čierasta nuohtaid mielde.
Buorre jietna albmás, čáppa luohti mii manai njuovžilit.
Veahá balus orui, muhto finálas juoiggai olu buorebut go generálageahččaleamis.
Dál nogai juoiganoassi, ja dál álgá lávlunoassi ges.
Vuoiti válljejuvvo gitta loahpas, iige juoigan ja lávlunoasi gaskkas nu mo ovdal.
Lávlunoasi lea artista Johan Kitti árvvoštallan Ávvira ovddas.
Lávlunoasi láidesteaba ges Ole Nicklas Mienna Guttorm ja Maja-Sofie Larsen Fjellström.
1. Sara Ájnnak, lávlla: «Mjárra» (mearra)
Son lea ieš čállán dán lávlaga.
Álggus lei veahá balus nu ii doallan riekta nuohta, dát buorránii dađis go lávllui.
Lávlla lea olbmo ja olbmo siskkáldasvuođa birra.
Lávlla lei jaskes lávlla mas maid gullostii luohti.
Lávlagis lei čáppa refreaŋga mii maid darvánii miilii.
Oidnui maid ahte lávlu leai hárjánan lávddi alde čuoddjut. Dát lávlla lei ubmisámegillii.
2. Jan Ole Hermansen ja Biret Margit Hætta Sara, lávlla: «Mun ja don»
Jan Ole Hermansen ja Kari Lisbeth Hermansen leaba čallán sihke sániid ja šuoŋa lávlagii.
Lávlla guoskkahallá máŋggalágan ráhkisvuođa.
Nu go isida ja eamida gaskkas, muhto maiddái iežas mánáide ja bearrašii.
Lávlagis lei buorre melodiija ja refreaŋga.
Lávlu guovttis ledje buorit jienat. Dát lávlla darvánii álkit millii ja dan dihte jáhkán mon ahte dát lávlla gullo ollu rádios maŋŋil Sámi Grand Prix.
Oidnui maid ahte leaba ovdal čuččodan lávddiid alde.
Jáhkán ahte dát lávlla boahtá dan golmma buoremusa searvái dán gilvvus.
3. Sunna Máret Utsi, lávlla: «Mu gorut»
Son lea ieš čállán lávlaga ja Roy Alexander Lind lea bidjan šuoŋa ja veahkehan teakstačállimiin.
Lávlla lea veagalváldima birra.
Sunnas lea čáppa jietna ja nagodii doalahit dan čađa lávlaga.
Dán lávlagis gullostii maid luohti refreaŋgas ja ovddeš SGP-vuoiti Nils Henrik «Nicko» Buljo koaraoassi, maid loktii dán lávlaga go gullostii refreaŋgas.
Lávlla darvánii maid millii ja dat sáhttá dahkat dan ahte beassá golmma buoremusa searvái. Lei power-lávlla.
4. Inger Marie Nilut, lávlla «Min duovdagat»
Lávlla lea luohti maid lea bidjan su bárdnái Mihkkal Juhan Heandaragii.
Son lea ieš čállán lávlaga ja Heaika Hætta bidjan šuoŋa dasa.
Dát lávlla leai movttegis lávlla mas lei luohti guovddážis mii darvánii dakkaviđe miilii.
Sus lei buorre jietna ja nagodii doalahit dan čađa lávlaga.
Oidnui maid ahte son lei hárjánan lávlu ja lea maid čuččodan ollu lávddiid nalde.
Mon jáhkán ahte son beassá golmma buoremusa searvvis dán gilvvus, soaitá vaikko vuoitit.
Oanehaččat sáhttá dadjat ahte leai buorre lávlla dahje luohti.
5. Emilia Helander Olsen, lávlla: «Bábirgirdi»
Lávlla muitala gullevašvuođa fuomášeamis, iežas ohcama birra ja iežas sajáiduvvamis.
Son lea lávlaga ieš čállán ja Kenneth Hætta lea bidjan šuoŋa lávlagii.
Lei jaskes lávlla ja lávlus lei rašes jietna mii heivii dán lávlagii.
Sus lei maid buorre jietna muhto gaskkohagaid ii nagodan doallat jiena lávllodettiin. Jietna jávkkai gaskkohagaid.
Dán lávlaga ferte moddii guldalit ovdal go dat darvána millii ja dan dihte in jáhke ahte son beassá golmma buoremusa searvái.
Lei maid váttis gullat maid lávllui go sánit eai lean čielgasat ja dego darvánedje njálmmi sisa.
6. Sagittarius, lávlla: «Ovttas leat»
Anne Gro, Børre, Roy Alexander ja Per William oassálastet Sagittarius joavkkuin dáinna lávlagin.
Roy Alexander lea ráhkadan lávlaga ja Anne Gro Gaup lea čállán teavstta lávlagii.
Jurdda lávlagiin ja teavsttain lea ahte buot olbmuin máilmmis lea seamma árvu. Dát lávlla leai rockalávlla.
Lávlus lei buorre jietna ja son nagodii doalahit dan čađa lávlaga.
Dán lávlagis gullostii maid luohti ja dat luohteoasit dahke dan ahte lávlla loktanii.
Dán lávlagis váilui juoga, muhto in dieđe riekta mii dat leai. Dán lávlaga ferte maid moddii guldalit ovdal go dat darvána miilii. In jáhke ahte dát lávlla boahtá golmma buoremusa searvái.
Dál nogai lávlunoassi, de lea logi minuvtta vejolaš jienastit su guđe don oaivvildat galggašii vuoitit goappáge oasi.
Jienastit sáhtát dáppe, go deaddilat voting bajimusas dien siiddus.
