Odne almmuhuvvo Ávvir+ mii lea sierra fálaldat Ávvira abonneanttaide. Sii guđet abonnerejit Ávvira, juogo báberaviissa dahje e-aviissa, ožžot buoret fálaldaga neahtas dál.
Odne almmuhuvvo Ávvir+ mii lea sierra fálaldat Ávvira abonneanttaide. Sii guđet abonnerejit Ávvira, juogo báberaviissa dahje e-aviissa, ožžot buoret fálaldaga neahtas dál.
– Mii leat hui ilus go dál leat gergosat almmuhit Ávvir Plussa, go dainna beassat nannet min digitála vuoruheami, muitala Ávvira váldodoaimmaheaddji Kari Lisbeth Hermansen.
Neahtta lea boahtteáigi
Váldodoaimmaheaddji čilge ahte digitála ođasgáldut lea boahtteáigi ja Ávvir ferte, nu go eará áviissat, čuovvut ovdáneami ja nannet digitála fálaldagaid.
– Mii lea dan rájes go rabaimet ođđa avvir.no siiddu buot áššiid almmuhan nuvttá. Dat lea maid gáržžidan man olu ja makkár áššiid mii leat almmuhan neahtas. Journalistihkka ja áššiid ráhkadit, nu go eará ge bargguid doaimmahit, máksá ruđaid, eat ge mii ge sáhte min bargiid bargguid nuvttá fállat. Preassadoarjja aviissaide lea maid čadnon buktagiidda main váldit mávssu ja dan geažil maid eat sáhte nuvttá addit buot min áššiid. Seammaláhkai go báberaviissa ferte oastit, de ferte máksit lohkat neahttaáššiid, čilge Hermansen.
Oassin juo abonnemeanttas
Oanehaččat čilgejuvvon de mearkkaša Ávvira Plussa-fálaldat ahte sii guđet abonnerejit Ávvira, juogo báberaviissa dahje e-aviissa, ožžot buoret fálaldaga neahtas dál.
– Dat dieđusge ii mielddisbuvtte sidjiide makkárge liigegoluid, dat lea juo mielde sin abonnemeantapáhkas. Abonneanttat fertejit dušše mannat avvir.no siidui ja registrerehahttit iežaset digitálageavaheaddjin, de besset oaidnit ja lohkat buot sisdoalu maid mii almmuhit, čilge Kari Lisbeth Hermansen.
Jus it leat abonneanta de sáhtát hui álkit diŋgot Ávvira min neahttasiiddus.
Sáhtát válljet juogo Ávvir Plussa páhka, mii máksá 50 ruvnno mánnui mas čuovvu eAviisa ja Ávvir Plussa, dahje Ollislaš páhka mii máksá 102 ruvnno mánnui. Das čuovvu eAviisa, Ávvir Plussa ja báberáviisa.
Gergosat veahkehit
Hermansen dovddaha ahte lea leamašan hušša dál maŋemus áiggiid ja leat gelddolaš oaidnit mo Plussa-almmuheapmi teknihkalaččat doaibmá dál go odne almmuhit dan.
– Lea olu mii galgá sadjái ja doaibmat, ja mii sávvat min lohkkit leat gierdevaččat ja dieđihit midjiide jus bártidit go galget logget sisa e-aviisii dahje lohkat Plussa-áššiid, lohká Kari Lisbeth Hermansen ja namuha vel ahte sii leat nannen kunddár-bálvalusa almmuheami oktavuođas ja leat gergosat veahkehit lohkkiid jus sis leat gažaldagat dahje bártidit sisaloggemiin.
Erenoamáš sisdoallu
Ávvira neahttadoaimmaheaddji Berit Marie Lise Eira lea maid ilus go dál almmuhit Ávvir Plussa.
– Dál beassat min digitála lohkkiide fállat viidát sisdoalu ja maid liigefálaldagaid mat leat várrejuvvon dušše min abonneanttaide. Mii álgit vuos fállat liigefálaldahkan govvagalleriijaid sámi doaluin, dološ govaid, njuolggosáddemiid iešguđetlágán sámi doaluin, ja fargga beassat maid rahpat digitála vuorkká mas leat buot ovddeš sámi aviissaid; Sámi Áiggi, Min Áiggi ja Áššu nummarat, muitala neahttadoaimmaheaddji.
Dasa lassin galget Ávvira neahttasiiddus beaivválaččat leat plussa-áššit.
– Dát leat áššit maid beassá lohkat jus lea Ávvira abonneanta, čilge Eira.
Ain olu nuvttá
Son deattuha vel ahte vaikke dál eai leat buot áššit šat nuvttá, de Ávvira neahttaáviissas ain leat olu áššit maid sáhttá lohkat maiddái vaikke ii leat abonneanta.
– Muhto mediamáŋggabealátvuođa geažil lea dehálaš ahte Sámis maiddái gávdnojit máŋga mediaásahusa, dasa adno tienas. Danne fertet váldigoahtit mávssu iežamet barggu ovddas, vai boahtteáiggis ain beassat fállat ođđasiid sámegillii juohke beaivvi, nu mo dássážii leat dahkan, lohká Ávvira neahttadoaimmaheaddji Berit Marie Lise Eira ja ávžžuha buot abonneanttaid registrerehit iežaset digitála geavaheaddjin.
Registrere iežat e-boastta bokte dahje riŋge 934 40 700.
