Lei álki politiijaide diehtit gii dat lei gii báhtarii sis. Vuoddji lei oainnát aitto addán iežas vuodjingoartta sidjiide.
Lei álki politiijaide diehtit gii dat lei gii báhtarii sis. Vuoddji lei oainnát aitto addán iežas vuodjingoartta sidjiide.
– Mii bisseheimmet silbaránes Audi Álttás. Oaččuimet vuodjingoartta vuoddjis. De válljii dát gávvilis olmmoš báhtarit politiijain.
Nie čállet Oarje-Finnmárkku politiijat bearjadaga árra eahkeda. Sidjiide šaddá dál álki diehtit gean áššáiduhttit báhtareames politiijain.
Beasadii droššerehkegis
Ii lean nu beare jierpmálaš dahku báhtarit droššerehkegis ge. Oarje-Finnmárkku politiijat čálle logi áigge iđđes ahte muhtin nuorra nisu válddii táksi Hámmárfeasttas Áltái. De son viehkalii rehkegis. Muhto politiijat gávdne su ja son fertii de máksit vuoddjái.
Beare gárremin
Muđui čállet Oarje-Finnmárkku politiijat ahte lávvordaga iđđesija fertejedje váldit gitta dievddu 20-jagiin ja doalvut su juhkanvuođaarrestii go lei rigeren ja muosehuhtten earáid muhtin olgobáikkis Álttás.
Hámmárfeasttas ges dolvo 40 jahkásačča eret guovddážis, go lei beare gárremin, ii ge lean luovos anihahtti gávpotbirrasis.
Cissadeame
Nieida, lagabui 20 jagi, Hámmárfeasttas ges ii lean galgat jur guovddážis cissat olgun mannan ija. Son válddahalai ja váido dál cissamis almmolaš báikkis.
Bossogohpis Álttás šadde ges heaittihit feastta maŋŋi eahket bearjadaga go bohte máŋga váidaga dán feastta oktavuođas.
