-Almmuhus-
-Almmuhus-
-Almmuhus-
OĐĐASATAtomavearjogielddus mearriduvvon ONas

Atomavearjogielddus mearriduvvon ONas

-

-

Ovttastuvvon Našuvnnat (ON) lea mearridan historjjálaš traktáhta man mielde atomavearjjut leat lobiheamit.

Ikte maŋŋelgaskabeaivvi mearridedje Ovttastuvvon Našuvnnat (ON) historjjálaš traktáhta man mielde atomavearjjut leat lobiheamit. 150 stáhta leat miehtan traktáhttii man mielde lea lobiheapme ovdánahttit, geahččalit, buvttadit, háhkat, hálddašit, vurket, doarjut ja geavahit atomavearjjuid.

– Máilbmi lea vuordán dán beaivvi
– Viimmat lea máilbmi ožžon traktáhta man mielde atomavearjjut leat lobiheamit, 71 jagi maŋŋel go ON vuosttaš háve dáhtui ollásit gieldit  kjernefysalaš vearjogeavaheami. Mis leat stuorra vuordámušat ahte Norga čuovvu dán proseassa viidásut, dadjá Frode Ersfjord, beaivválaš jođiheaddji «Ii atomavearjjuide» searvvis.  

Šiehtadusa mielde ii leat stáhtain lohpi ovdánahttit, čađahit geahččalanbávkalemiid, buvttadit ja earáládje, háhkat, hálddašit, vurket, fievrridit, geavahit dahje nihttit geavahit atomavearjjuid. Stáhtat mat leat miehtán mearrádussii eai sáhte ge veahkehit dahje movttiidahttit earáid searvat lobihis doaimmaide, iige leat lohpi vurket atomavearjjuid iežaset territoriai.

Boahtit muitit dán beavvi

– Mii boahtit muitit  geassemánu 7. beaivvi 2017  dan beaivin go máilbmi ii šat dohkkehan ahte atomastáhtat rihkkot lohpádusaid. Atomastáhtat leat máŋgii geahččalan bissehit dáid ON-šiehtadallamiid, čuoččuha Ersfjord.

Čakčamánu 20. beaivvi rájes lea vejolaš vuolláičállit traktáhta. Atomaáigi álggahuvvui 1945s ja čakčamánu 20. beaivi soaitá báhcit muitun beaivin go dat buot eanemus billisteaddji bealit atomaáiggis loahpahuvvo.

Norga berre vuolláičállit

– Norga berre vuolláičállit dán traktáhta nu jođánit go vejolaš, ja bargat dan ala ahte sin lihtolaččat maiddái dahket dan seamma. Leat guhká vuordán dán traktáhta ja dat boahtá čalmmustahttit atomastáhtaid lassánan atomavearjoráhkadeami, ja atomavearjjuid dohkketmeahttun humanitára váikkuhusaid, lohká Ersfjord.

 

 

-Almmuhus-