Muhtin atomačázevuolfanas buollá Zvjozdotsjka-skiipadealádagas Arkhangelsk fylkkas Ruoššas. Ii okta ge galgga leat roasmmohuvvon buollima geažil.
Muhtin atomačázevuolfanas buollá Zvjozdotsjka-skiipadealádagas Arkhangelsk fylkkas Ruoššas. Ii okta ge galgga leat roasmmohuvvon buollima geažil.
Skiipadealádat, industriija buvttadanbáiki, United Shipbuilding Company duođašta dáhpáhusa ja čilge ahte ii okta ge leat roasmmohuvvon buollimis, čállá Russian Today.
– Eai oidno dolat, muhto guovllus lea suhkkes suovva, muitala muhtin gáldu Tass ođasdoaimmahahkii.
Fatnasis eai leat vearjjut
Ruošša ođasdoaimmahaga Interfax dieđuid mielde eai galgga čázevuolfatnasis vearjjut, nu leat muhtin politiijagáldu čilgen ođasdoaimmahahkii. Atomačázevuolfanas galgá buollán áhcahanbarggu oktavuođas.
– Čázevuolfatnasa atomareáktor giddejuvvui ja vearjjuid lástejedje eret ovdal go álggahedje barggu, čilge skiipadealádaga gulahallanolmmoš.
Duođalaš
Norgga birasgáhttenvuođđudus Bellona govvida dáhpáhusa duođalažžan.
– Mii ballat fatnasa reáktora radioaktiiva luoitimis jus eai nagot fargga dárkkistit ja jáddadit, čállá Bellona atomafysihkkár Nils Bøhmer preassadieđáhusas.
Bellona dieđuid mielde buollá gummi mii lea birra dan 154 mehter guhkkosaš fatnasa.
Gáldu: NTB ođasdoaimmahat.