Sámediggi lea juolludan 135 000 ruvnnu duodjekursii.
Olmmáivákki duodjesearvvi doaibma, Grenebua, lea ožžon Sámedikkis 135 000 ruvnno lágidit duodjekurssa.
– Sámediggi atná dehálažžan veahkehit seailluhit mearrasámi duodjeárbevieruid, ealli mearrasámi servodagas, lohká Sámediggeráđđi Maja Kristine Jåma preassadieđáhusas.
Ovddida báikkálaš duoji
Dáinna doarjagiin sáhttá Olmmáivákki Duodjesearvi fállat kurssaid gođđit ulloliinniid, buvttadit Ivggu gávtti málliid, goarrunkurssa, gođđit ránuid ja lágidit veaddekurssaid, earet eará.
Olmmáivákki Duodjesearvi vuođđuduvvui miessemánu 24. beaivvi 1966:s. Duodjesearvi ovddida báikkálaš duoji buot dásis. Birrasii 80 lahttu gullet dál searvái.
Gávppis “Grenebuas”, Olmmáivákkis Gáivuonas, sáhttá oastit čáppa árbevirolaš dujiid, maid báikkálaš buvttadeaddjit ja duojárat leat duddjon. Báikkálaš buvttadeaddjiide lea duodji dehálaš lassesisaboahtun.
– Searvi buvttada buriid, áigeguovdilis buktagiid main gáibidit kvaliteahta ja dárkilvuođa, čállá Sámediggi.
