Riddu Riđđu áigu Oslo World Music festiválas čuvget seminárain nissonolbmuid hástalusaid musihkkamáilmmis.
Riddu Riđđu áigu Oslo World Music festiválas čuvget seminárain nissonolbmuid hástalusaid musihkkamáilmmis.
Dán jagáš Oslo World Music festiválas ovttasbargá Riddu Riđđu máŋgasiin earáin lágidit seminára mii čalmmustahttá hástalusaid, maid nisson musihkkarat, buvttadeaddjit ja managerat sáhttet vásihit sin árgabeaivvis.
Nissonrivttiid rahčamat
Ollu artisttat geavahit musihka gaskaoapmin friddjavuođa ovddas soahtat. Máŋgga sajis máilmmis leat nisson musihkkariid rahčamat dáiddalaš friddjavuođa ovddas maiddái rahčamat nissonrivttiid ovddas. Lea vajálduvvon oassi go ságastallet dásseárvvuid birra musihkkamáilmmis.
Ovddasta Sámi
Riddu Riđđu oassálastá Sámi geahččanguovlluin semináras Maxida Märak bokte, guhte lea nuorra sámi artista ja aktivista ja son oassálastá paneladigaštallamis. Märak lea dovddus iežas rehálaš ja politihkalaš teavsttaiguin, ja semináras áigu son hupmat iežas sámi duogáža, iežas musihka ja feminismma birra. Maŋŋel seminára doallá son konseartta.
– Lean sihkar ahte Maxida Märak addá seminárii sierra oali, go son lea čeahpes nuorra sámi artista geas lea ollu maid áigu muitalit, lohká Riddu Riđu feastiválahoavda Karoline Trollvik.
Dáhpáhus «Kvinner i musikken», dahje nissonolbmot musihkas lea ihttin, duorastaga, Oslos Nobels Fredssenter báikkis.
