-Almmuhus-
OĐĐASATAstoáiggis ráhkadit rádioprográmma

Astoáiggis ráhkadit rádioprográmma

-

-

Lujávrri nuorat leat álggahan ráhkadit nuoraid rádioprográmma man namma lea “Nurash Inn” dahje “Nuoraid jietna”. Boahtte áiggi birra eai vuos dadje nu ollu.

Valentina Sovkina lohká ahte sin studio (Guoládaga Sámi Rádio – Ávvir) lea guoros ja das sáhttá bargat jus lea miella, ná álgá iežas muitalusa Lujávrri nuorra sápmelaš Andrey Zhvaviy gii lea oktan dain geat álggahedje iežaset nuoraid rádioprográmma.

 

Guoládaga Sámi Rádio

Guoládaga Sámi Rádio lei 2002 jagi rájes gitta 2008 jagi rádjái leamašan prošeaktan man ruhtadii earret eará Intereg Sápmi. Maŋŋá go prošeakta áigodat loahpahuvvui 2008 de lei jurddašuvvon ahte Guoládaga Sámi Radio galgá leat iešbirgejeaddji rádiostašuvdnan. Muhto jo jagis 2010 rádio beasai duođalaš ruđalaš vattis dillái maid dagahii dan ahte rádio doaibma masa ledje olusat hárjánan loahpahuvvui das. Otná beaivvi mielde Guoládaga Sámi Rádio jođiheaddjin lea Valentina Sovkina.

 

Báifáhkka

Andrey ja ustibat Aleksander Slupachik, Milana Sapelnikova eai leat jurdilan ge. Finastedje studios, čorgejedje ja álge veahá dukkoraddat.

Álggus dieđus oahpásmuvaimet rusttegiidda ja álggiimet smiehtat maid son dies sáhttá bargat, muitala Andrey Zhvaviy.

Iežas lohká riŋgejedje vel ovtta ustibii gii lei  juste dalle Murmánskkas ja muitaledje dása ahte livččii vejolaš juoidá báddet go lei fállon atnui studio.

 

Ii leat jurddašuvvon, muhto šattai beare ná

Vuosttaš báddemis prográmma guossin lea leamaš sámi rapmusihkkár Jarsem Galkin dainna gussiin ráhkadedje prográmma mas lei rapbihtá ja oanehis ságastallan.


Studios: Jarsem Galkin lohkame rapbihtá. Govven: Nurash Inn.

Maŋŋá go čuohpaimet ja almmuheimmet nehttii de olbmot álge jearahit: gos ja goas sáhttá guldalit dán? Jarsem dieđus lei jo mannan fas Murmánskii dalle, čilge Andrey.

Ieš lohká dát lei baicce geahččaleapmi. Nubbi prográmma gussiin deaivvadedje márkanis.

Aleksander lei váccašan olgun go deaivvan doppe Marjja ja bovdehii su studioi, muitala Andrey ja lasiha.

– Eat mii oppa ge jurdilan ge su bovdet studioi.

Dáinna gussiin ságastedje jo veahá nuoraid áššiid birra. Dán háve bádden šattai badjelaš logi minuhtta. Muhto áŋke mearridedje oanidit dan.

– Dás šattai nu ollu hupmu ahte ii lean ge somá, danin čuohpaimet veahá.

 

– Hállu ja miella leat, muhto máhtu haga ii olle guhkas

Ná vástida Andrey go jerren boahtte áiggi áigumušaid birra. Sii leat dassážii almmuhan Soundcloud nammasaš neahttabáikái oanehis dahje demo-veršuvnnaid. Maiddái lohká leat gergosat vel moadde prográmma báddet muhto eai sáhtte plánet nu guhkas ovddosguvlui.

Miellasat viiddidit doaimma, muhto máhtu haga ja beare áŋgiruššamiin ii olle guhkas.

Prográmmat leat almmuhuvvon nehttii  leat ruoššagillii, muhto rádioprográmma doaimmaheddjiin lea miella geahččalit sámegillii vel dahkat.

 

 

-Almmuhus-