-Almmuhus-
KULTUVRAAstoáigedoaimmain evttohuvvon Spellemann-bálkkašupmái

Astoáigedoaimmain evttohuvvon Spellemann-bálkkašupmái

-

-

Eatnašat Sámis dovdet su Riikkaidgaskasaš Boazodoalloguovddáža direktevran, muhto astoáiggis lea son čuojahan orgela badjel 20 000 olbmui. Dál lea son ja su joavku evttohuvvon oažžut Spellemann-bálkkašumi.

Spellemann

Ođđajagemánu 5. beaivvi almmuhii Spellemann-bálkkašupmi geat dán jagi leat evttohuvvon oažžut Norgga deháleamos musihkkabálkkašumi. 

 

Musihkkáriid searvvis leat maiddái sápmelaččat.

 

Spellemann-bálkkašumis leat iešguđet luohkáid mielde evttohuvvon artisttat ja joavkkut.

 

Luohkát leat Mánáidmusihkka, Blues, Country, Danseband, Elektronika, Álbmotmusihkka/Árbevirolašmusihkka, Indie, Jazz, Klasihkkalaš musihkka, Metal, Popjoavku, Popsolista, Rock, Dálááiggemusihkka, Urban, Viissat, Rabas luohkká, Tono komponistabálkkašupmi, Teakstačálli, Dán jagáš ođđa artista & Gramo-stipeanda, Dán jagáš albuma, Dán jagáš buvttadeaddji, Dán jagáš musihkkavideo, Dán jagáš lávlla.

 

Gáldu: spellemann.no

 

– Diehttelasat lea mearehis buorre dovdu, bealistan in lean dán vuordán, lea hui somá, nu lohká Anders Oskal, guhte čuojaha orgela

Pristine joavkkus.

Duogábealde gullo musihkka ja movttegis joavkolahtut.

 

Báddemin ođđa skearru 

Bearjadaga, beaivvi maŋŋil go beakkehii ahte sii lea evttohuvvon oažžut Spellemann-bálkkašumi Blues-luohkás, «Reboot» skearru ovddas, lea joavku studios, báddemin ođđa skearru.

– Báddemiin áiggošeimmet geargat dán vahkkoloahpa, muhto eat dieđe vuos goas leat gergosat almmuhit ođđa skearru, lohká Anders.

Joavku lea aiddo ožžon skearrošiehtadusa ovtta Duiskka stuorámus iešheanálaš skearrofitnodagas, Nuclear Blast.

 

– Bures ovddidan joavkku

Son vuhtto leat hui rámis iežas joavkolahtuid geažil, ja rámida sin buohkaid buori barggu ovddas.

– Sii leat bures bargan ovddit skearru ovddidemiin, ja čuojahan feara gos. Go evttohuvvot bálkkašumi oažžut, de čájeha ahte min skearru adno árvvus, lohká son.

Háleštettiin de Anders jámma namuha Heidi Solheima, joavkku lávlu, ja lohká son dat diehtá buoremusat ja hoide eatnasa das mii guoská márkanfievrredeapmái ja nu ain. 

 

– Astoáigedoaibma

Ieš Anders oainnat lohká musihka ja čuojaheami leat astoáigedoaibman alddis.

Dábálaččat son ovddida boazodoalloáššiid ja čuvge earret eará dálkkádatrievdamiid váikkuhusaid.

– Musihkka lea guhká leamaš munnje dehálaš astoáigedoaibman, ja lean čuojahan Pristines ja eará joavkkuin guhká. Muhto mus lea nu hástaleaddji bargu ahte in beasa čuovvut buot geardomátkkiid, čilge son.

Pristine lea bluesjoavku, Romssas eret ja dat ásahuvvui 2006:s.

Joavku lea vuoitán Davvi-Norgga meašttirgilvvuid blues-suorggis ja Union Blues Cup 2011:s.

2012:s mátkkoštii joavku Memphisii USA:i, gos oassálaste The International Blues Challenge gilvvus ja lea vuosttaš Norgga joavku mii dán gilvvus lea beassan beallefinálaide.

(Ášši joatká gova vuolábealde)


HÁSTALEADDJI BARGU: Beaivválaččat bargá Anders Oskal Riikkaidgaskasaš Boazodoalloguovddáža direktevran. Doppe son ovddida máilmmi boazodollii áššiid, ja mátkkošta maid dávjá. Dán govas oaidnit go son ja Máilmmi boazoálbmogiid lihtu generálačálli Johan Mathis Turi deaivvadeigga Mongolia parlameantta áirasiin ja ambassadevrrain Guovdageainnus.
Vuorkágovven: Nils Johan Vars

Čuojahan 20 000 olbmui

Joavku lea dan rájes johtán sihke USA:s ja Eurohpás, muhto unnán Norggas.

Vaikke Andersis lea hástaleaddji bargu Riikkaidgaskasaš Boazodoalloguovddáža direktevran, de lea son goitge muhtomin astan searvat geardomátkkiide.

– Juo, muhtomin gal lean astan. De lean beassan čuojahit sihke smávva lávddiin ja stuorát lávddiin. Mun lean čuojahan konsearttain gos leat leamaš birrasii 20 000 guldaleaddji, muitala son.

Muhto ieš gal lohká buoremusat liikot smávit konsearttaide.

– Dalle beassá lagabui guldaleddjiid ja oažžu singuin oktavuođa, čilge son.

 

– Dáppe Sámis it leat gal nu dovddus čuojaheaddji?

 

– Hehehehe, na dan mun in gal leat, mieđiha son ja čaibmá.

 

– Na, go eai nu máŋggas soaitte diehtit ahte leat musihkkár, de dáidet olusat leat hirpmahuvvan go beakkehii ahte lehpet evttohuvvon Spellemann-bálkkašupmái?

– Na, gal dan dieđát, go ieš ledjen hirpmahuvvan, gal earát maid máhttet de hirpmahuvvat, čaibmá son.

 

– Garra gilvu

Anders ja earát Pristine-joavkkus lohket leat stuorra vuoitun dušše evttohuvvot Spellemann-bálkkašupmái. 

Vuoitima birra ii loga Anders nu jurddašit vuos.

– Mii eat čuojat árbevirolaš bluesa, nu ahte jus jury dan deattuha, de eat dáidde gal vuoitit. Ja Blues-luohkás lea maid garra gilvu. Muhto mu mielas, ja jáhkán daid earáid mielas maid, lea stuorra vuoitu dušše go leat evttohuvvon, lohká son.

Pristine joavku lea evttohuvvon oažžut Spelleman-bálkkásumi Blues-luohkás.

Joavkkus čuojahit Heidi Solheim (lávlu), Espen Elverum Jakobsen (gitar), Anders Oskal (orgel), Åsmund Wilter Kildal Eriksson (bássa) ja Kim Karlsen (rumbbut).

Billy T Band ja MK’S Marvellous Medicine leat maid evttohuvvon seamma luohkás.

 

Earálágan bluesjoavku

Stiilla dáfus de jođaša Pristine árbevirolaš bluesa, funka, Amerihká máttastáhtarocka ja 70-logu bluesrock gaskka.

Ovddasteaddji Heidi Solheim lea buohtastahtton beakkán amerihkálaš bluesartisttaiguin nu mo Beth Hartain, Dana Fuchsain ja Janiva Magnessain.

– Mii leat geahččalan hástalit blues-suorggi ja fanahit dan iežamet vuohkái. Seammás go min musihka ruohttasat čielgasit vulget bluesas, čilge Anders.

 

Boađášedje áinnas Beassášfestiválii

Anders ja muđuid Pristine joavkkus sávvet Spellemann-bálkkašumi dagahit ahte begget eambbo maiddái Norggas.

– Mii galgat čuojahit oalle olu boahtte giđa ja geasi, muhto eanaš olgoriikkas. Mii sávvat dán dagahit ahte beasašeimmet čuojahit eambbo Norggas maid, lohká lávlu Heidi Solheim.

Anders Oskal lea oainnat sutnje čujuhan go jerren boađášedjet go Sápmái čuojahit, ovdamearkka dihte beassášfestiválii Guovdageidnui:

– Juo, mu mielas gal livččii erenoamáš somá čuojahit ruovttus, lohká Anders.

– Aaah, juo, dan mii gal áinnas háliidivččiimet, čuovvola Heidi maid.

Ja de leaš oaidnit, beassat go vásihit alitšuoŋaid diein guovlluin maid.

 

Eará sápmelaš maid evttohuvvon

Ondt Blod joavku, mas Aslak Heika Hætta Bjørn (lávlu) Alexander Våga Mortensen (gitára) John Nilsen (gitára) Kristoffer Joel Høe (bássa) Håvard Rushfeldt (rumbbut), čuojahit, leat evttohuvvon oažžut dán jagáš ođđa artista & Gramo-stipeandabálkkašumi.

Maiddái Aksel Rykkvin, Astrid S, Cezinando, Dagny ja Matoma leat evttohuvvon dán seamma luohkás.

Bálkkašumit geigejuvvojit Sentrum Scenes, Oslos, ođđajagemánu 28. beaivvi.

 

 

 

 

 

 

 

 

 

 

-Almmuhus-