Norgga ássit leat gaskamearálaččat duhtavaččat sihke stáhtalaš ja gielddalaš bálvalusfálaldagain, ja duhtavašvuohta mii guoská measta buot dearvvašvuođafálaldagain lea buoret go buohtastahttá ovdalis áiggi duhtavašvuođain.
Dát lea muhtin bohtosat maid Direktoratet for forvaltning og økonomistyrings (DFØ) dahje Hálddahuslaš ja ekonomiijastivrendirektoráhtta lea gávnnahan ássiidiskkadeamis čállet preassadieđáhusas. Dat iskkadeapmi čađahuvvo juohke nuppi jagi.
Duhtavašvuohta muhtin gielddalaš bálvalusain lea hedjonan, muhto eanaš bálvalusaid duhtavašvuohta lea buorránan. Dat gusket earret eará gieldda dearvvašvuođabálvalusaide nu mo fástadoaktárii, doavtterfáktii ja buohcciidruktui. Dasa lassin leat olbmot eambbo duhtavaččat gieldda kollektiivafálaldagain go ovdal. Olbmot eai leat nu duhtavaččat vuođđoskuvllain, muhto mearkkašahtti leat ahte olbmuin, geain eai leat mánát skuvllas, futnot dan eambbo go sii geain lea mánná skuvllas.
Olbmot leat duhtavaččamusat politiijain, suodjalusain ja buohcciviesuin, maiddái NAV lea ožžon buoret beaggima. Duhtavašvuohta hedjona go lea sáhka universitehtain ja allaskuvllain.
Sáhttá lohkat ahte olbmuid duhtavašvuohta sihke stáhta ja gieldda bálvalusfálaldagain lea gaskamearálaš allat. Olusat cuigot ahte gieldda astoáige- ja kulturfálaldat lea hedjonan korona-áigodagas. duhtavaččamusat leat olbmot politiijain ja ná buorre árvosáni eai leat ožžon 2010 rájes.
Ássiid mielas lea šaddan álkibun gulahallat almmolaš ásahusain go ovdal.
Ássiin ii leat nu stuorra jáhkku ahte besset nu olu váikkuhit politihkalaš mearridemiide.
Ássit geat ásset Norgga guovddáš gielddain lea duhtavaččamusat bálvalusfálaldaga kvalitehtain, muhto ássit geat ásset Norgga doaresbeale gielddain eai leat nu duhtavaččat.
Ássiidiskkadepmi sáddejuvvui 40 000 ássái Norggas ja 9900 ássi vástidedje mo sii árvaledje ahte Norgga almmolaš bálvalusfálaldagat leat doaibman. Dás sáhtat lohkat eambbo: Les oppsummeringen av resultatene her
