Rovdata lea ovttasráđiid guđain olgoriikkalaš áššedovdiin árvvoštallan ealli mii govvejuvvui Leavnnjas Finnmárkkus mannan geasi, ja sii duođaštit ahte lea gollešakala mii lea govvejuvvon. Lea vuosttaš gollešakala duođaštuvvon Norggas.
Guovvamánus dán jagi almmuhuvvojedje govat mat leat govvejuvvon fuođđokámerain ja giehtatelefuvnnain ja mat soite čájehit gollešakala, láhtengillii Canis aureus, Finnmárkkus. Ledje Stáhta luonddubearráigeahču ja muhtin priváhta olbmo govat mat ledje govvejuvvon Leavnnjas 2019:s ja 2020:s. Birasdirektoráhtta lea bivdán Rovdata ásahusa árvvoštallat leago ealli gollešakala vai ii, jus lea, de lea dán ealli vuosttaš duođaštus Norggas.
Duođaštit ealli
– Mii leat árvvoštallan govaid. Dasa lassin leat mii sádden govaid guđa áššedovdái olgoriikkas geat dutket gollešakala ja geat leat govven daid fuođđokámerain. Buohkat leat ovttaoaivilis dát jáhkkimis čájeha gollešakala. Ealli lea maid oidnon Nuortamearas ja Suomas ja soaitá Levdnjii joavdan lunddolaš vugiin, lohká Rovdata jođiheaddji Jonas Kindberg, čállá Rovdata ruovttusiiddus.
Nuorta-Eurohpá ealli
Gollešakala ii leat goassege ovdal gávdnon nu davvin go Leavnnjas. Gollešakala (Canis aureus) gávdno stuorra guovlluin Máttanuorta-Eurohpás, Gaska-Nuorttis, Guovddáš- ja Máttanuorta-Asias. Áššedovdit navdet dat sáhttá leavvat guhkás, erenoamážit go leamaš uhcán muohta, bivvalis dálvvit, uhcán boraspiret, unnit mirkkogeavaheapmi ja eanadoalu rievdadeamit. Norgalaččaide lea dovddus, ealli lea čivgan Latvias ja Esteeatnamis maŋimuš golmma jagi. Rovdata čállá go lunddolaččat boahtá Norgii, de eai čilge dan amas eallin.
Gollešakala lea sullii seamma stuoris go rieban. Deaddá gaskamearálaččat 10-12 kilo gitta 15 kiloi. Borrá smávva njiččehasaid, ráppiid, lottiid, šattuid, dávttehis elliid ja doabbariid. Birge iešguđetlágan guovlluin, sáttoábis gitta jekkiide. Garvá obbasa ja váriid, liiko buorebut eanadoalu guovlluide ja rođuide lahka jogaid ja jávrriid. Eurohpás vákšojuvvo fuođđokámerain ja elliidčuorvumiin.
