-Almmuhus-
OĐĐASATÁššáškuhtton leat bahkken vissui ja ákšuin cuvkon viessodávviriid

Áššáškuhtton leat bahkken vissui ja ákšuin cuvkon viessodávviriid

-

-

Muhtin badjelaš 30-jahkásaš dievdu lea áššáskuhtton ja ferte Sis-Finnmárkku diggegoddái go galgá leat sániiguin ja daguiguin áitán nuppi olbmo nu ahte lea dagahan stuora balu.

Dáhpáhus galgá leat geavvan eahkedis, juovlamánus 2017:s, go lei mannan nuppi dievddu viesu olggobeallái ja lei vašes láhttenmálle sus.

Doppe galgá leat huškun ja dearpan seainni ja doallan stuoranibbii mainna áittii nuppi dievddu vahágahttit. Dasto galgá leat cuvken oađđenlanja láse, ja njuiken láseráiggi vissui.

Dievdu áššáskuhtton leat lobi haga mannan nuppi olbmo vissui.

 

– Cuovkkui diŋggaid 

Go de beasai vissui sisa, de galgá leat huškon ja ákšuin mollen viessogálvvuid, TV, jietnarusttega, datarusttega, láseskábe ja galmmihanbumbbá. 

Maŋŋel dáhpáhusa galgá dievdu leat vuoddján muohtaskuteriin, vaikko sus ii lean skutervuodjinlohpi.

 

Gáibidit buhtadit

Áššáskuhttinbáhpiris čuožžu maid čállon ahte gáibidit sihke niibbi ja ákšu duoguštit dievddus, ráŋggáštuslága paragráfa 69 vuođul.

Seammás gáibiduvvo buhtadusa máksot DNB Dáhkádusa AS:i ja divdui gean dávviriid galgá leat billistan.

Dievdu lea áššáskuhtton njealji paragráfa rihkkon Ráŋggáštuslágas ja Geaidnojohtolatlágas.

Diggi lea ođđajagemánu 28.beaivvi, Sis-Finnmárkku diggegottis.

Ávvir ii leat fáhten albmá bealušteaddji ságaide dán áššis.

-Almmuhus-