Riikkaadvokáhtta lea sádden Laila Anita Bertheussena áššáskuhttinmearrádusa Nationála stáhtaadvokáhttaámmáhii.
Dáid dieđuid almmuha NTB. Riikkaadvokáhtta ii áiggo kommenteret mearrádusa NTB:i ja čujuha viidáset Nationála stáhtaadvokáhttaámmáhii jus háliidit eanet kommentáraid.
Bertheussen lea ovddeš justiisaministara Tor Mikkel Wara ovttasássi.
Juovlamánu 6.beaivvi 2018 čuovganeapmái lei muhtin sárgon roahkkeruossa ja čállán «rasista» Wara viessoseaidnái ja biilii.
Njukčamánu 14.beaivvi diibmá áššáskuhtii Politiijaid Sihkarvuođabálvalus (PST) Bertheussena go galgá leat cáhkkehan sudno biilla mii lei sudno viesu olggobealde. Bertheussen lea čađat áigge čuoččuhan iežas leat vigiheapmin.
(©NTB)
