Vaikke dán jagáš šiehtadallamiid oktavuođas gáibidii NBR iežaset organisašuvdnii olu ruhtalassáneami, muhto eai ožžon, de liikká eai dárbbat nealgát, jus geahčestit iežaset báŋkokontoi.
Vaikke dán jagáš šiehtadallamiid oktavuođas gáibidii NBR iežaset organisašuvdnii olu ruhtalassáneami, muhto eai ožžon, de liikká eai dárbbat nealgát, jus geahčestit iežaset báŋkokontoi.
Norgga Boazosápmelaččaid Riikasearvvi (NBR) riikačoahkkima oktavuođas Troandimis ovdanbuvttii riikastivra rehketdoalu.
2016 rehketdoalus oidno ahte sii eai gal dárbbat nealgát, vaikke vel eai ožžon ge dan stuora ruhtalassáneami maid ledje gáibidan, dán jagáš boazodoallošiehtadallamiid oktavuođas.
Miljovnnat lummas
Rehketdoalus oidno ahte diimmá jagis lei NBR:s 1 064 243 ruvnno badjelbáza. 2015:s lei fas 464 817 ruvnno badjelbáza.
Dat mielddisbuktá ahte sis lea báŋkkus buorre ágga fitnat, go dohko lea dál čoaggana 2 341 611 ruvnno čielgaruhta.
Golbma jahkebálkká
Rehketdoalus oidno maid ahte NBR lea 2016:s ožžon 7,9 miljovnna ruđa sisa.
Sii mákset bálkká sullii golmma olbmui.
Bálkágolut 2016:s ledje badjel 2,2 miljovnna ruvnno, earret eará jođiheaddji Ellinor Marita Jåma, oažžu 576 854 ruvnno, ja riikastivra fas 417 000.
Riikačoahkkin golaha
Lei nubbijođiheaddji, Per John Anti, gii ovdanbuvttii 2016 rehketdoalu.
Son muitalii ahte golut, earret eará dat golut mat livčče galgan diibmá máksot, eai leat mákson ovdal dán jagi.
Son maid čilgii ahte diimmá miljovdnasaš badjelbáza lea dan dihte go ii lean riikačoahkkin 2016:s.
– Duohta badjelbáza lea birrasiid bealle miljovnna 2016:s, čilge son.
Anti duođašta Ávvirii ahte riikačoahkkin máksá birrasiid miljovnna ruvnno, ja dán jagi birrasiid 1,2 miljovnna, go lea 70-jagi ávvudan jahki.
