Sámediggeráđđi juolluda 200.000 ruvnnu lassidoarjaga Kárášjoga Ealáhussearvvi ássanmoktaprošeavtta čađaheapmái ja loahpaheapmái. – Dál eat dárbbaš sihkkut makkár ge doaimmaid ja beassat baicce sihkkarastit doaibmabijuid kvalitehta, lohká prošeaktajođiheaddji Ann Kristin Laiti.
Sámediggeráđđi juolluda 200.000 ruvnnu lassidoarjaga Kárášjoga Ealáhussearvvi ássanmoktaprošeavtta čađaheapmái ja loahpaheapmái. – Dál eat dárbbaš sihkkut makkár ge doaimmaid ja beassat baicce sihkkarastit doaibmabijuid kvalitehta, lohká prošeaktajođiheaddji Ann Kristin Laiti.
Kárášjoga Ealáhussearvvi ássanmoktaprošeakta galgá ovddidit ealáhusaid, háhkat eanet ássanmiela ja positiivvalaš beaggima Kárášjoga gielddas. Prošeakta ásahuvvui ođđajagis 2014:s ja loahpahuvvo dán jagi loahpas. Sámediggeráđđi lea mearridan juolludit vel 200.000 ruvnnu ássanmoktaprošektii, ja dát gal illudahttá.
– Vuoi man buorre, dalle eat dárbbaš sihkkut makkárge doaibmabijuid. In lean gullan dan birra, nu ahte dál vuorddašan beare duođaštusa Sámedikkis, lohká ássanmovtta prošeaktajođiheaddji Ann Kristin Laiti.
Fuomášuhttá Kárášjoga
Oktiibuot lea ássanmielaprošektii bušeterejuvvon 2.237.000 ruvnnu, earret Sámedikki lea maiddái Kárášjoga gielda, Gielda- ja ođasmahttindepartemeantta ja Kárášjoga Ealáhussearvi ruhtadan prošeavtta. Sámediggi lea oktiibuot juolludan 600.000 ruvnnu prošektii.
– Dál beassat bisuhit sisdoalu kvalitehta. Lea buorre dovdu go vuoruhuvvot ja beassat čađahit reasta plánaid. Mun jáhkkán prošeavttas mearkkašumi Kárášjohkii, dat addá eanet fuomášumi ja orrunmiela. Mii čalmmustahttit maiddái ealáhusaid, čilge Laiti.
Olahan áigumušaid
Kárášjoga Ealáhussearvvi ássanmoktaprošeakta lea ásahan neahttabáikki mii juohká dieđuid Kárášjoga birra. Vaikke neahttabáiki ain lea dušše dárogillii, de galgá siidu maiddái ilbmat sámegillii ja eŋgelasgillii lagamus áiggis. Prošeakta lea maiddái kárten astoáiggefálaldagaid, bálvalusaid ja gávppašanvejolašvuođaid gielddas, dát galgá ávkin sihke ássiide, ealáhusfitnodagaide ja báikkálaš servviide. Dasa lassin leat kárášjohkalaččaid dárbbut kártejuvvon vai boahttevaš ealáhusásaheaddjit dihtet dárbbuid birra. Gelbbolašvuođalokten ja diehtojuohkinbáŋku ealáhusaid várás leamaš maid oassin doaibmabijuin.
Hohkahit nuoraid ruoktot
Kárášjogas lea olmmošlohku njiedjan maŋimuš jagiid, muhto ássanmovttaprošeaktajođiheaddji lohká dili dál stáđisin.
– Maŋimuš logut čájehit ahte Kárášjogas lassánii olmmošlohku njealji olbmuid, nu ahte mii leat nákcen stabiliseret loguid. Ássanmoktaprošeakta lea earret eará lágidan studeantadeaivvadeami gos čohkket báikkálaš nuoraid geat gazzet oahpu eará guovlluin. Sidjiide muitalit makkár fálaldagas mis leat jus máhccet ruoktot maŋŋel go čađahit oahpuideaset, čilge prošeaktajođiheaddji Ann Kristin Laiti. Ássanmovtta prošeakta áigu maiddái dáid juovllaid bovdet nuoraid deaivvadeapmái.
Buoret integreren
Ovdal go prošeakta loahpahuvvo juovlamánus lea de ulbmil maiddái ásahit bistevaš sámi kultur- ja giellakurssa olbmuide geat bohtet olggobealde Kárášjoga. Dá lea ovttasbargoprošeakta Sámi joatkkaskuvllain, Sámi našuvnnalaš gealboguovddážin ja ABC-company fitnodagain. Dát kurssat galggašedje buoridit integrereme. Kárášjogas ásset olu Ruošša, Thaieatnama, Filippinene ja Kenya nissonat. Sii vásihit ahte eai leat doarvái bures integrerejuvvon servodahkii ja danin oaidná ássanmovttaprošeakta dárbbu maiddái sin gelbbolašvuođa čalmmustahttit Kárášjoga ealáhusaiguin.
Háliida eanet beaggima
Ássanmielaprošeakta lea maiddái almmuhan muhtin positiiva ođđasa Kárášjoga ealáhusaid birra mánnosaččat interneahtas dahje mediain, prošeaktajođiheaddji vuohttá dás ávkki.
– Oainnán ovdamearkkadihti ahte Ávvir ja eará mediat leat čálligoahtán eanet positiiva ođđasiid Kárášjoga birra, ja hástalan ge juohke media muitalit golbma positiiva ođđasa Kárášjoga birra ovdal juovllaid. Dákkár hástalus lei Girkonjárggas ja doppe lassánii beaggin, lohká Laiti.
Ovdal go prošeakta šaddá historján, de lea Kárášjoga Ealáhussearvi maiddái bargagoahtán ohcat ovttasbargoguimmiid vai besset joatkit doaibmabijuid ovddidit.
– Jus sis-Finnmárkku gielddaid galgá čalmmustahttit buorebut, de berrejit maiddái Guovdageaidnu, Porsáŋgu, Deatnu ja Unjárga minguin ovttas bargat ássanmovtta doaimmain. Mun doaivvun Sámi ealáhusguovddáža loktet olles guovllu, loahpaha Laiti.
Dehálaš doarjut
Sámediggeráđđi, mii dál lea juolludan lassi ruhtadoarjaga Kárášjoga Ealáhussearvvi ássanmoktaprošektii, doaivu ahte dát sáhtašii leat ovdamearkan eará gielddaide mat rahčet seamma hástalusaiguin go Kárášjoga gielda. – Mii diehtit ahte olbmot fárrejit smávva suohkaniin gávpogiidda. Jus prošeakta addá eanet ássanmiela, de soaitá dákkár prošeavttaide dárbu maiddái eará suohkaniin Sámis. Ovdal go prošeakta loahpahuvvá, de dáhtut gullat Kárášjoga Ealáhussearvvis mo sii leat lihkostuvvan doaimmain, sin vásáhusat leat ávkkálačča jus sullasaš prošeavttat ásahuvvojit eará báikkiin, lohká sámediggeráđđi Ann-Mari Thomassen.
