-Almmuhus-
-Almmuhus-
OĐĐASAT Ássanmoktabálkkašupmi Bilala ruovttusuohkanii

Ássanmoktabálkkašupmi Bilala ruovttusuohkanii

-

-

Ákŋoluovtta suohkan lea bártidan beaggimiin, muhto dál lassána olmmošlohku ja aktivitehta suohkanis. Dál geigejuvvo  Finnmárkku fylkkagieldda ássanmoktabálkkašupmi suohkanii go leat lokten suohkana.

–Ákŋoluokta lea dahkan buori barggu maŋemus 10 jagi. Vaikko sii leat leat bártidan guhká, de leat dál ásahan jorgalahttinoperašuvnna. Sis lea positiiva ealáhusovdáneapmi ja buorre kultureallin, earret eará Stjernekamp oasálastimiin dán jagi.

Dá lei ágga manne Ákŋoluokta suohkan oaččui ássanmoktabálkkašumi dán jagi, dieđiha Finnmárkku fylkkagieldda gulahallanhoavda, Trond Magne Hendriksen, preassadieđáhusas. 

– Mii leat nu ilus. Njuorasmuvvat ja čevllohallat go leat vuoitán dán bálkkašumi. Lean leamaš Ákŋoluovtta sátnejođiheaddji 12 jagi, muitala sátnejođiheaddji Eva Husby preassadieđáhusas. 

 

Heajos beaggin

Son muitala maiddái ahte logi jagi áigi, go Ákŋoluovtta suohkan álggahii jorgalahttin prošeavtta ovttas ássiiguin ja ealáhusaiguin, de ledje hástalusat heajos beaggima geažil. Husby lohká maid ahte son šaddá ilus go olbmot rámiin muitalit ahte leat Ákŋoluovttas eret. 

– Go human beaggima birra, de oaivvildan geat mii áigut leat ja movt mii čájehit dan. Mun nu illosan go olbmot rámiin muitalit ahte leat Ákŋoluovttas eret. 

Husby oaivvilda maid ahte dá lea álbmotbálkkašupmi Ákŋoluovtta ássiide, ja nu bovde ge joavkkuid ja servviid searvat bálkkášumigeigemii. 

– Mun áiggun ahte juohke joavku ja searvi vállje ovtta olbmo gii galgá searvat bálkkášumigeigemii. Bálkkášumi geigen lea golggotmánu 15.beaivvi fylkaviesus Čáhcesullos. Dá lea álbmot bálkkašupmi,dadjá Husby loahpas.

 

Vuođastus bálkašupmai

Preassadieđáhus cealká maid ahte Ákŋoluovtta suohkan oažžu bálkkašumi ollu sivaid geažil.  Son gii evttohii Ákŋoluovtta, govvida suohkana ná: 

–  Ákŋoluovtta suohkan ja sin ássit leat guhkit áiggi bargan garrasit oažžut aktiiva ja ásaiduhtiin servodaga, mii nanne suohkana. Olmmošlohku lassána ja aktivitehta šaddá maid stuorát. 

- Advertisement -
-Almmuhus-