Politiját leat gažahan áššáiduhtton albmá ikte eahkes. Almmái čilgi iežas beali ja lei mielas ovttasbargat, muhto son ii mieđhan iežas áššálaččan áššáiduhttima mielde, čállá Finnmárkku politiijáguovlu preassadieđáhusas.
Politiijat leat gažahan áššáiduhtton 17 jahkásaš albmá ikte eahkes. Son navdojuvvo leat goddán 18 jahkásaš albmá guhte lei barggus muhtin gávppis Čáhcesullos. Áššáiduhtton almmái čilgi iežas beali ja lei mielas ovttasbargat, muhto son ii mieđihan iežas áššálažžan áššáiduhttima mielde, čállá Finnmárkku politiijaguovllu preassadieđáhusas.
– Mii eat vel dieđe mii dat lea duogáš vearrodahkui ja mii eat leat gávnnahan ahte livččii galgan leat makkárge relašuvdna áššáiduhtton albmá ja goddonalbmá gaskkal, muitala rihkusášši dutkanjođiheaddji Steffen Andreassen Finnmárkku politiijaguovllus.
Áššáiduhtton almmái beassá beaivvi mielde lohkat ja dohkkehit gažadeami man čađahii ikte. dán oktavuođas son oažžu vejolašvuođa buktit ođđa čilgehusa jus nu háliida.
Jotket guorahallat
Politiijat leat gažahan máŋga vihtana sihke vuossárgga ja maŋŋebárgga. Sii leat gažahan sin geat ledje gávppis go goddin dáhpáhuvai ja muđuid olbmuid geain lea leamaš oktavuohta áššáiduhtton albmán sihke ovdal ja maŋŋel dáhpáhusa. Dál jotket guorahallat buot beliid maid dássážii leat gávnnahan áššis.
Sihtan riektepsykiátralaš árvvoštallama
Politiijat leat bivdán diggegottis beassat čađahit riektepsykiátralaš árvvoštallama áššáiduhtton albmás. Gávpi gos goddindáhpáhus dáhpáhuvai lea gárvásit guorahallon ja nu besset gávppi rahpat beaivvi mielde go kriminálateknihkkárat ja guorahallit vel dárkkistit gávppi.
Gáibidan obdukšuvnna
Preassadieđáhusas čállet ahte politiijat leat gáibidan obdukšuvnna goddojuvvon albmás, ja dát galgá plána mielde dahkkot Romssa Universitehta buohcciviesus gaskavahkku.
Kriminálateknihkkárat Finnmárkku politiijaguovllus čuvvot obdukšuvnna. Politiijat eai leat vel gávdnat vearjju mii geavahuvvui goddimis, ja nu sii jotket ohcet vearjju.
Eai muital lea go goddin darvehuvvon váksunapparáhtii
Áššáiduhtton albmá bealušteaddji Vidar Zahl Andersen muitala NRK Finnmárkui ahte dát duođalaš áššáiduhttin čuohcá su klientii, muhto ahte son veadjá bures ášši ektui. Rihkusáššiguorahallanjođiheaddji Steffen Andreassen dadjá NRK Finnmárkui ahte politiijaid bealis oaivvildit alddiineaset leat deaivilis duođaštusa, ja ahte leat áššáiduhttán rivttes olbmo áššis. Politiijat eai dáhto muitalit lea go goddindáhpáhus darvehuvvon vákšunapparáhtii. Andreassen dattege muitala vákšunapparáhtaid ožžon buriid dieđuid mat leat ávkin áššis.
Bivdet doahttalit politiijaid
Begget ságat sosiála mediain sihke áššáiduhtton albmá ja eará birrasiid birra, muhto mii bivdit olbmuid doahttalit dieđuide maid politiiijat almmuhit, dadjá rihkkusáššiguorahallanjođiheaddji NRK Finnmárkui. Maiddái gottahallan albmá bearaš lea mediaid bokte ávžžuhan olbmuid heaitit spekuleret ášši birra, čállá NRK Finnmárku.
Goddin dáhpáhuvai lávvordaga
Lávvordat eahkeda, váile diibmu 22, dat gottahalai 18 jahkásaš Håvard Pedersen go lei barggus muhtin gávppis čáhcesullos Finnmárkkus. Politiijat, buohccibiila ja buollinčáskadeaddjit bohte báikái, muhto 18 jahkásaš albmá heagga ii lean gádjumis.
Áššáduhtton almmái rájusgiddagasas
– Lei álgoálggus bidjon giddagasčoahkkimii disdaga iđidii, Sis-Finnmárkku diggegottis.
Muhto áššáiduhtton albmá agi dihte čađahuvvui giddagassii bidjan mánnodaga eahkeda, muitala Finnmárkku politiijaguovlu.
Áššáiduhtton almmái bidjui vuossárgga rájusgiddagassii guokte vahkku reive ja galledangildosiin, sus lea maid gielddus aviissaid ja áibmomedia geahččat.
Áššáiduhtton bárdni mieđai giddagassii.
Vuolleahkásaš dorvoohcci
Sotnabeaivve duođaštedje politiijat ahte leat áššáiduhtton 17 jahkásaš albmá.
Áššáiduhtton almmái bođii Norgii vuolleahkahaš dorvoohccin 2015:s ja sus lea gaskaboddosaš orrun lohppi.
Ii leat vel sihkar leat go Norgga eiseválddit mearridan sáddet su eret Norggas.
Politiijat leat dieđihan ahte sii vuhtiiváldet bártni psyhkalaš dili ja áigot bivdit su biddjot áicilvuođa gehččui.
