Dál sáhtát oažžut veahki uhcidit energiijageavaheami ja buoridit ássankvalitehta seammás go leat mielde várjaleamen ođđasishuksenarkitektuvrra iešvuođaid ja kulturhistorjjálaš árvvuid.
– Prošeavtta áigumuššan lea čohkket dieđuid áigeguovdilis viesuin mat gávdnojit. Dasto háliidat oažžut oktavuođa viessoeaiggádiiguin geat dárbbašit buriid ráđiid ođasmahttimiidda ja divodemiide, dadjá Marit Reiersen, Finnmárkku fylkkagieldda plána- ja kulturossodagas.
Árvvoštallet nuvttá
Jus almmuhat ahte háliidivččet searvat prošektii ja jus de válljejuvvot oassálastin, de árvvoštallá Finnmárkku fylkkagielda du viesu áibbas nuvttá.
Don oaččut buriid ráđiid das movt dálu galggat ođđasit skoađastit vai dat šaddá lieggaseappot ja movt energiija sáhttá geahpedit.
– Jus háliidat, de sáhttit maid árvalit movt viesu sáhttá rievdadit buoridan dihte geavahankvalitehta, beasatlašvuođa ja arkitektuvrra iešvuođaid. Mihttomearrin lea gávdnat ođasmahttinčovdosiid mat heivehuvvojit viessoeaiggáda dárbbuide, ja ahte ođasmahttinbarggut čađahuvvojit nu guhkás go vejolaš dálá viessostandárddaid mield,dieđiha Finnmárkku fylkkagielda.
Das lea sáhka dušše dain viesuin mat huksejuvvojedje nuppi máilmmisoađi maŋŋil (1945-1960).
Dat sáhttet leat sihke dábálaš viesut ja viesut gos orrot máŋga bearraša, muorraviesut dahje muvraviesut.
– Dat ii daga maidige jus viessu ovddalgihtii lea juo ođasmahttojuvvon dahje viiddiduvvon. Ráfáidahtton viesuid lea maid vejolaš árvvoštallat, dieđiha Finnmárkku fylkkagielda.
