Norgga-Ámerihká fitnodat Kolos pláne huksegoahtit diehtovurkenguovddáža Bálágii Nordlándii.
Birasministtar Vidar Helgesen (H) oassálastá bearjadaga čoahkkimis gos almmuhit plánaid Bálága suohkanii, gos ásset birrasii 2500 ássi.
Márkanastá Norgga
– Mii oaidnit ahte bargguhisvuohta njiedjá ja ahte ođđa bargosajit ásahuvvojit. Ráđđehus áigu heivehallat nu ahte sáhttet ásahit diehtoguovddáža Norgii, ja mii leat divadiid vuolidan vai nogadit geasuhit dakkár doaimmaid deike. Ledjen aiddo deaivvadeame Apple ja Google fitnodagaiguin Californias, ja doppe márkanfievrridin Norgga leat ruoná dihtorguovlun, muitala Helgesen TV2žii.
Ođđa bargosajit
Mánnodaga almmuhuvvojedje Kolos huksenplánat.
– Šaddá eanet dárbu diehtoguovddážiidda go máilbmi ovdána ja šaddá eanet digitálan. Norggas leat buorit eavttut diehtoguovddážiid ásaheapmái. Mis lea ođasmahtti energiija ja čoaska guovlu. Dat sáhttá šaddat dehálaš šaddi ealáhussan ja buktit ođđa bargosajiid guovlluide, muitala Helgesen.
Máilmmi stuorámus diehtoguovddáš
Kolos fitnodagas galgá BBC dieđuid vuođul leat ruhtadanplána, masa Norgga investorat leat gergosat bidjat ruđaid. Dál geahččala maid muhtin Amerihká báŋku searvat ollislaččat ruhtademiin.
Diehtoguovddáš lea plánejuvvon leat 600 000 kvadráhtamehtera stuoru, ja das leat njeallje geardi. Sihkkaris el-rávdnjelinjá lea Bálága stuorámus ovdamunni dakkár ásaheapmái.
Máilmmi stuorámus diehtoguovddáš lea Kiinnás dál ja lea measta 600 000 kvadráhtamehtera stuoru. (©NTB)
