Romssa ja Finnmárkku fylkkadiggi lea ođđa lávdeinstitušuvnnas váldoeaiggát.
Fylkkadiggi meannudii maŋŋebárgga ásahit ođđa teáhtera. Dál vuordá fylkkadiggi Kultuvradepartemeantta juolludit doarjaga vai doaimmat sáhttet joatkit.
– Kvääniteatteri ásaheapmi lea okta dain gelddoleamos prošeavttain kvena ealáskahttimis mii lea dáhpáhuvvan maŋimuš jagiid, ja dál lea áigi stáđis ja bissovaš doibmii. Prošeaktajoavku lea dahkan buori barggu, ja danne lei álki fylkkaráđđái miehtat leat mieleaiggádin, dadjá ekonomiija ja kultuvrra fylkkaráđđi Ronald Wærnes (Gb) preassadieđáhusas.
Golmma-čearddat-deaivvadeapmi
Fylkkaráđđi ovddida regiovnna golmma-čearddat-deaivvadeapmin, ja oaivvilda ahte kvena lávdeinstitušuvnnas lea dehálaš rolla ovdánahttimis giela ja identitehta davvin, ovttas sáme- ja dárogielas ja kultuvrras.
– Oaidnit makkár rolla Beaivváš teáhteris lea leamaš ovdánahttimis sámegiela, kultuvrra, identitehta, musihka ja lávdedáidaga jagiid mielde. Dál sávvat ahte Kvenateáhteris šaddá sullásaš fápmu nu go Beaivváš ja Hålogaland teáhteriin leamaš riikaoassái 70-logu rájes, dadjá Wærnes preassadieđáhusas.
Birasseasti konseapta
Komiteajođiheaddji, Tommy Berg (SV), lea maiddái lihkolaš fylkkadikki ovttajienalaš mearrádusas, ja lea hirbmat ilus Vihrinen teatteri (ruoná teáhter) konseapttas.
– Kvääniteatteri lea birasseasti konseapta mii galgá geavahit dáláš vistti ja áŋgiruššet ovttasbargat eará institušuvnnaiguin. Kvenagiella ja kultuvra lea guovdil ja mii galgat leat mielde doarjumis ja ovdánahttimis. Teáhteralmmájin illudan mun vuosttaščájálmassii čakčamánus ja lea gelddolaš oaidnit maid teáhter olaha teáhterhoavddain, Frank Jørstadain, dadjá Tommy Berg preassadieđáhusas.
Oasusopmodat lea biddjon 100 000 ruvdnui. Romsa ja Finnmárkku fylkkasuohkan lea mearridan oastit 65 proseantta ossosiin ja leat dasto mieleaiggát ovttas Ráissa suohkaniin (25 proseantta), Álttá suohkaniin (5 proseantta) ja Čáhcesullo gielddain (5 proseantta).
