Porsáŋggu gielda lea dál ásaheame kriisajoavkku maŋŋel go politiijat leat gávdnan jápmán olbmo ja dutkagoahtán dan goddináššin. Girku lea maid rabas buohkaide odne eahket.
– Dat lea surgadis ášši ja šohkkan báikkálaš servvodahkii, lohká Porsáŋggu sátnejođiheaddji Aina Borch.
Sátnejođiheaddji lohká dákkár surgadis ášši čuohcat garrasit:
– Go dákkárat dáhpáhuvvet báikkálaš servvodagas, de dat čuohcá buohkaide.
Gulahallet politiijaiguin
Aina Borch muitala ahte sii gieldda bealis leat dál gulahallamin politiijaiguin ja sii leat ovttasráđiid ásaheame kriisajoavkku gildii.
Girku rabas
Sátnejođiheaddji muitala ahte girku lea odne eahket rabas buohkaide geat dovdet dárbbu čoahkkanit go dákkár dáhpáhus lea geavvan lagasbirrasis.