-Almmuhus-
-Almmuhus-
OĐĐASATÁsahan ráđđeaddi­bálvalusa areála­áššiide

Ásahan ráđđeaddi­bálvalusa areála­áššiide

-

-

Boazodoallošiehtadusa 2022/2023 oktavuođas lea soabaduvvon álggahit ráđđeaddibálvalusa areálaáššiide.

Prošeakta galgá álgovuorus doaibmat golbma jagi, ja golbma olbmo leat virgáduvvon barggu čađahit.  Ráđđeaddibálvalus lea bagadeaddji boazoealáhussii. Prošeavtta fágajođiheaddji Isak Henrik Eira muitalii prošeavtta birra boazosápmelaččaide geat ledje čoahkkanan Norgga Boazosápmelaččaid Riikkasearvvi riikačoahkkimii Muoffies Nordlánddas.

– Dakkár bálvalussii lea eahpikeahta dárbu boazoealáhusas. Visot obbalaš kárttat čájehit ahte boazoealáhus massá čađat eatnamiid, lohká Isak Henrik Eira. 

Sisabahkkemat stuorra hástalussan

Boazoealáhusa stuorámus hástalusat áiggiid čađa leat leamašan sisabahkkemat, juohke jagi masset eatnamiid iešguđet sisabahkkemiid geažil. 

– Leat nu stuorra duovdagat maid leat manahan maŋemuš moattilogi jagis. Visot obbalaš vuogádat lea nu ráhkaduvvon ahte boazosápmelaččas ii leat doarjjaveahkkeortnet areálaáššiide. Lihkus gávdno Protect Sápmi, ja sii leat bargan hui buori barggu maŋemuš logi jagis, lohká Isak Henrik Eira.

Eira lea ieš bargan Protect Sámis. 

Veahkehit orohagaid

Isak Henrik Eira muitala ahte ođđa bálvalusas leat máŋga beali, muhto vuosttažettiin lea bargun veahkehit orohagaid. 

– Fálaldat lea orohagaide. Dál maid álggus šaddat vuoruhit lea rámmaeavttuid buoridit. Ii galgga dárbbašit logi jagi geahčen bargat seamma láhkai áššiiguin, ja mii fertet eiseválddiid ektui bargat ahte rámmaeavttut leat sajis, lohká Isak Henrik Eira. 

Losit leat boazosápmelažžan

Son čujuha ahte dál lea dilálašvuohta nu ahte boazoealáhus massá eatnamiid ja dainna ožžot liigegoluid ja boazosápmelaččat masset tietnasa.

– Mii oaidnit maid ahte lea losit bargat boazoealáhusas go čađat gáržžiduvvojit eatnamat. Riska maid stuorru bargat bohccuiguin, lohká Isak Henrik Eira. 

Gealbu, muhto ii kapasitehta

Sisabahkkemat dagahit ahte lea losit leat boazosápmelažžan dál go ovdal. 

– Orohagain lea olu gelbbolašvuohta, muhto váilu kapasitehta bargat áššiiguin. 

Sisabahkkemat dagahit ahte lea mihá losit dál bargat bohccuiguin máŋgga guovllus go leat nu olu sisabahkkemat. Dat dagaha ahte eai leat šat olbmot bargat areálaáššiiguin, muitala Isak Henrik Eira.

Ráđđeaddibálvalus galgá fállat kurssaid vai boazosápmelaččat ožžot máhtu mo galget bargat areálaáššiiguin.

– Galgá maid  álkit diehtit guđe vuogádaga galgá geavahit. Mii sáhttit maid  láhčit dili nu ahte orohagain sáhttá šaddat buoret kapasitehta oažžut oahpu mo galgá bargat go bohtet areálaáššit orohahkii, lohká Eira. 

Dat galgá nuvttá, ja álggos šaddet garra vuoruheamit ráđđádallanbálvalusas. 

Ráđđeaddit

Biret Risten Eira ja Marit Østby Nilsen leaba virgaduvvon ráđđeaddin. 

-Almmuhus-