Sváipa čearru, Grans čearru, Semisjaur Njarg čearru ja Sáltoduottar Orohat eai dohkket stáda hálddašeaddjin ja ásahit moratoriija Násavári badjel, gosa ruvkedoaimma plánejit ásahit.
Sváipa čearru, Grans čearru, Semisjaur Njarg čearru ja Sáltoduottar Orohat eai dohkket stáda hálddašeaddjin ja ásahit moratoriija Násavári badjel, gosa ruvkedoaimma plánejit ásahit.
Čearut leat sádden preassadieđáhusa ahte dákko bokte dál almmuhit, ovttas báikki olbmuiguin sihke Norgga bealde ráji ja Ruoŧa bealde ráji, ásahit moratoriija Násavári badjel.
Guovllus, mii lea sámi riekteguovlu, galgá jođihuvvot sámi vuođđooainnuin Sváipa čearu, Gran čearu, Semisjaur Njarg čearu ja Sáltoduottar orohaga bokte.
Norgga ja Ruoŧa láhka ii galgga leat dohkkehuvvon báikkis gitta Násavári ruvkeplánat bissehuvvojit.
– Eai leat bures boahtimat
– Iežamet ovddas ja min guovllu historjja árvvus atnima dihte, min máttuid ovddas geat gillájedje ja biinniduvvojedje juste dán báikkis go Sámi guovlluid álge koloniseret, galgat suddjet Nása ja min sámi kultuvrra ođđa roasuin. Ruvkefitnodagat eai leat buresboahtimat deike, lohká Sváipa čearu Sárá Ájnnák.
Čearru cealká preassadieđáhusas ahte guovlu lea agibeaivvi leamaš sámi boazodoalloguovlu, ja nu galgá joatkit leat boazodoalloguovlun. Dat galgá čielgasit nannejuvvot ja dohkkehuvvot Norgga ja Ruoŧa lágain.
Ruvkeásaheapmi
Jurddašuvvon ruvkeásaheapmi lea ođđa birasroassu duottarguovlluide gos ovdalaččas leat sisabahkkemat.
Elkem ASA áigu rahpat ođđa ruvkke Násavári davágeahčái. Ruvki boahtá rievdadit olles luonddu go sihke roggamat ja luoddahuksemat dahkkojuvvojit dohko.
– Ruvkedoaibma ja boazodoallu leat guokte ealáhusa mat eai soaba doaibmat seamma báikkis. Plánejuvvon ruvke galgá čearuid árbevirolaš guovlluide ja dohko eat hálit makkár ge sisabahkkemiid, lohká Sváipa čearu jođiheaddji Ingermar Israelsson.
Gevrejit sisabahkkejeddjiid eret
Nása moratoriija báikái ii sáhte mihkkege sisabahkken dáhpáhuvvat mii lea sámi rivttiid ja beroštumiid vuostá Nása guovllus, čuoččuha Násavári Moratoriija ja joatká:
– Ii okta ge ruvkedoaibma, nu go ráhkkaneapmi, plánen, luoddahuksen dahje eará doaibma, mii hehtte ja vuorjá árbevirolaš boazodoalu báikkis, sáhte leat dan báikkis.
– Čearut galget doaimmahit iešmearridannjuolggadusaid, eai ge suova agibeaivvis makkár ge sisabahkkemiid ásahit Násavárrái ja olles dan guvlui, čállá Násavári Moratoriija preassadieđáhusas.
