Guovdageainnu suohkan lea geahčadeame vejolašvuođaid vuovdit Máze orrun- ja bálvalusguovddáža, vai earát álggahit doaimmaid doppe ja seammás luvvešii suohkana váttis dilis.
Guovdageainnu suohkan lea geahčadeame vejolašvuođaid vuovdit Máze orrun- ja bálvalusguovddáža, vai earát álggahit doaimmaid doppe ja seammás luvvešii suohkana váttis dilis.
Guovdageainnu suohkanstivra lei juovlamánusmearridan láigohišgoahtit earáide Máze orrun- ja bálvalusguovddáža. Odne galge suohkanstivrras meannudit guovddáža boahtteáiggi anu, muhto gesse dan eret áššelisttus. Sátnejođiheaddji Johan Vasara čilge ahte seammás go ovdagoddi lei meannudeame, de bođii Viessobáŋkkus diehtu ahte viessu ii sáhte geavahuvvot eará doibmii go dasa masa lea ruhta juolluduvvon.
– Suohkanii lea addon doarjjan 4,7 miljovnna ja daddjo hui čielgasit ahte viessu galgá adnot birrajándor dikšun- ja fuolahusviessun. Dalle eat sáhte láigohit eará doaimmaide. Dan rájes go diehtu bođii Viessobáŋkkus, de leat bidjan bargguid johtui iskat mo sáhttit boahtteáiggis geavahit viesu, ja seammás vuhtii váldit Viessobáŋkku. Mii fertet geahčadit movt čoavdit hálbbimus lági mielde suohkanii, go dat lea min ovddasvástádus doalahit ruhtadili čorgadin, lohká son.
Vuovdit viesu
Vasara lohká nubbi čoavddus suohkanii sáhttá leat vuovdit viesu.
– Nubbi eaktu lea geahčadit vejolašvuođaid vuovdit viesu, ja nu čoavdit iežamet ruhtačanastagas mii lea Viessobáŋkui. Dat eaktuda ahte doppe lea buorre prošeakta Mázes mii buvttášii bargosajiid.
Luvvešii suohkana
Vasara muitala son lea ieš geahčadan iešguđetlágan vejolašvuođaid.
– Doppe sáhtášii ealáhusgoahti, jus muhtun áiggošii ovdamearkka dihte álggahit turistadoaimmaid. Heivešii maiddái dokumentašuvdnaguovddáš Mázii, man birra lei hupmu moadde jagi áigi. Dieđan Sámedikkis lea politihkalaš dáhttu diekkár guovddáža álggahit. Dat čalmmustahtášii Máze, Guovdageainnu ja sámi historjjá, ja maiddái buktán bargosajiid Mázii ja seammás luvven suohkana dan váttis dilis.
Gávdnat čovdosa álggos
Vasara oaidná daid prošeavttaid realisttalažžan, muhto lohká ovddemus vuoruhit gávdnat čovdosa Viessobáŋku eavttuid ektui.
– Dál ferte vuos álggos geahčadit geavaheami dan ektui maid Viessobáŋku lea bidjan vuođđun,lohká son.
