-Almmuhus-
SMÁVVAOĐĐASAT SÁMISÁrvvoštallet fállat goalmmát boahku

Árvvoštallet fállat goalmmát boahku

-

-

Álbmotdearvvašvuođainstituhtta lea dál kárteme geat dárbbašit vel ovtta boahkkodosa. 

Norgga álbmotdearvvašvuođainstituhta (FHI) dieđuid mielde eai dárbbaš eanas olbmot eambbo go guokte dosa koronaboahkus, muhto sii guorahallet dál guđet riskajoavkkut dárbbašit goalmmát dosa. 

– Eat jáhke dearvvaš olbmuid, geat dál geasset ožžot boahkuid, dárbbašit lassi boahkkodosaid buoril, jus oba dárbbašit ge, dadjá FHI bajitdoavttir Sara Viksmoen Watle VG aviisii.

Goalmmát dosa sáhttá nannet suoji ja dahkat olbmo immunan guhká. Máŋga riikka árvvoštallet dál dan, nugo Dánmárku gos čakčat juo soitet fállagoahtit. Stuorabrittánia maid árvvoštallá goalmmát boahku ja leat dutkame makkár boahkut doibmet buoremusat booster-boahkkun. 

Norggas ii leat FHI:s makkárge konkrehta plána, muhto čuvvot dárkilit movt boahkut váikkuhit, čállá VG.

Watle lohká eanemus jáhkehahttin ahte fállet booster-boahku vuorrasiidda ja olbmuide geain lea rašes immunsuodjalus dahje earáide geain iešguđet sivaid geažil ii leat doarvái buorre suodji dávdda vuostá.

FHI ii leat mearridan áiggi goalmmát dosaide. 

 (©NTB)

-Almmuhus-