Guovdageainnu doavtterbálvalus ja doavttervákta leat ožžon olu jearaldagaid koronavirusa birra.
Guovdageainnu doavtterbálvalus dáhttu olbmuid geat geavahit doavtterbálvalusa ja doavttervávtta árvvoštallat lea go dárbu doavtterdiibmui dál. Dat lea vai eastadit njoammunvára buhcciide, ja vai bisuhit kapasitehta.
Guovdageainnu suohkan čállá ahte sin váldobargu dál lea identifiseret dáhpáhusaid main lea várra ahte virus leavvá dearvvašvuođaásahussii ja njoammu hearkkes joavkkuide.
Sii čállet ahte fertet árvvoštallat sáhttá go du ášši čoavdit elektrovnnalaččat dahje telefovnna bokte, ja fargga lea maid vejolaš videokonsultašuvnna bokte. Dieđihit maid ahte doavtterdiimmu, masa ii leat hoahppu, berret cealkit eret.
