Sara Marielle Gaup Beaska ja Steinar Raknes almmuheigga bearjadaga konsearttas iežaska ođđa skearru.
Sara Marielle Gaup Beaska ja Steinar Raknes almmuheigga bearjadaga konsearttas iežaska ođđa skearru.
Ovttas soai ráhkadeaba musihka, mii vuolgá jazzas, juoigamis ja americanas.
Sara Marielle lea dovddus das go lea seaguhan boares juoiganvuogi ja ođđaáigásaš musihka ja Steinar Raknes lea okta čeahpimus Norgga jazzbassisttaid, lávluid ja lávllačálliid gaskkas.
Vuosttaš stuorra konsearta
Arvvas lei vuos lávddis ja dan maŋŋel vuvddiiga iežas ođđa skearru festiválabáikkis. Dát lei sudno vuosttaš stuorra konsearta Sámis.
– Konsearta manai hui bures, muhto lean leamaš hui gealdagasas, ahte mo olbmot vuostáiváldet munno ođđa CD-skearru, dadjá Sara Mariell Gaup Beaska maŋŋel konseartta.
Son lohkáge olbmuid orron vuos veahá jurddašeamen guldalettiin, muhto sávvá sin liikomin.
– Álggos ii lean oktage lávddi ovddas, muhto go álggiime čuojahit, de bohte dánsestit, dadjá son.
Lunddolaš ovttasbargu
Duorastaga čuojahiige Arvvas rahpankonsearttas ovttas ruošša joavkkuin Chirgilchin, mainna leigga hárjehallan dušše golbma beaivvi. Sara Marielle dadjá goittot dovdan hui lunddolažžan čuojahit joavkkuin.
– Mun jáhkkan dan lei dan dihte go mis leat hui ollu seammá musihka árbevearut, dadjá son.
