Goappašagat lihkostuvaiga goabbatge luohtejoavkkus, dilli rievddai ja lei áigi lávket viidáseappot. Nu riegádii Sara Marielle Gaup Beaska ja Steinar Raknes ovttasbargu, ovttas leaba álggahan joavkku Arvvas.
Mannan geasi čuojaheigga Sara Marielle Gaup Beaska ja Steinar Raknes vuosttaš gearddi fárrolagaid, dalle leigga mátkkis Japánas. Nuorra Guovdageainnu juoigi lei máilmmi beakkán Inga Juuso-rohki sadjásažžan Skáidi joavkkus.
– Inga ii veadján vuolgit čuojahit. Son lei evttohan mu go Steinar jearai makkár nuorra juigiin sáhtášii ovttasbargat, ja dat lei dieđusge munnje hui stuora gudnin, čilge Sara Marielle.
Ráhkadeigga ođđa joavkku
Sara Marielle dohppii hástalusa ja ovddastii Skáiddi. Son juoiggai luđiid maid Inga Juuso lávii juoigat, muhto soai leigga maiddái ráhkadan ođđa šuoŋaid.
– Mun ledjen álggos balus, jurddašin máhtán bat jur mun Iŋggá sadjásažžan, muitala son.
Inga Juuso elii buoza, ja vádjolii árračavčča. Dalle mearrideigga Sara Marielle ja Steinar joatkit ovttasbarggu, muhto soai ásaheigga áibbas ođđa joavkku.
Seaguhusmusihkka
Steinar Raknes lea norgalaš jazzmusihkkár, son lea nuorravuođa rájes čuojahan kontrabássa. Sara Marielle Gaup Beaska lea juoigi, ja su dovdat earret eará Adjágas joavkkus. Sudno ođđa joavku lea Arvvas.
– Arvvas seaguha luđiid ja lávlagiid mat gullet iešguđetlágan musihkkašlájaide. Munnos leat árbevirolaš ja áibbas ođđa luođit, maiddái lávlagat leat ođđasat dahje dovddus ovdalaččas, čilgeba Steinar ja Sara Marielle.
Skearru almmuhuvvo
Maŋŋel go beakkehii ahte soai leaba ásahan duo, de leaba geargan čuojahit máŋga konseartta. Soai leaba goappašagat lihkostuvvan ovdalaččas, ja háliideaba maiddái ođđa joavkkuin olahit dobbelii.
– Ovdal beassážiid johtigohte Troanddimis Davvi-Norgii. Galge čuojahit konsearttaid golbma vahkku, dasa lassin báddejetne skearru, čilge Raknes. Skearru almmuheaba Riddu Riđu festiválas geasset.
Liikostan luohtái
Steinar Raknes lea eret Midsundas Møre ja Romsdalas. Su ovddeš bargobáiki lea Musikk i Troms, ja doppe oahpásmuvai Inga Juusoin gii oahpahii sutnje olu luođi birra.
– Iŋgá lei erenomáš juoigi ja olmmoš, ja nu lea maiddái Sara Marielle. Mu mielas lea erenomáš go guktot ovdanbuktiba seamma musihkkašlája, muhto boađus lea nu guovttelágan. Mu mielas lea luđiin fiinna ja gelddolaš melodiija ja ritmma, luohti lea nu ealas, čilge Steinar go galgá muitalit luođi mearkkašumi birra.
Viidáseappot
Seammás go Arvvas álggahuvvui, de mearrideigga Sara Marielle Gaup Beaska ja Lawra Somby heaittihit iežaska joavkku Adjágasa, sudno mielas lei áigi lávket viidáset.
– Lean jurddašan dien birra. Ii olmmoš sáhte leat adjágasas agibeaivvi, dat han lea dego niehkomáilbmi. Oktii fertet gullát ja mannat viidáseappot. Munno maŋimuš skearrus lea šuokŋa man namma lea «Viidáseappot», mun in leat ipmirdan ovdal ahte die dat lei loahppa. Eai galgan šat boahtit eambbo skearrut, die lei mana dahje báze dearvan, muitala Sara Marielle.
Duostil
Sara Marielle rámida iežas ođđa ovttasbargoguoimmi, ja muitala iežas dál hui gearggusin bargat musihkain. Dán čalmmustahttá maiddái joavkku namma.
– Arvat lea dovddus sátni ja geavahuvvo dávjá negatiiva oktavuođas, dego in mun arvva vuolgit olggos go lea nu buolaš. Lean jorgalan sáni positiivan, go mun arvvan hui olu dál. Mun arvvan čuojahit, mun arvvan ođđa luđiid bidjat ja mus lea ođđa mokta bargat musihkain, čilge Sara Marielle, gii lea dáiddalašfriddjavuođain sojahan arvat sáni joavkonamman Arvvas.
Bovdeba eará musihkkáriid
Go Ávvir deaivvada Arvvas joavkkuin, de lea joavku aiddo čuojahan Romssa gávpogis. Sara Marielles ja Steinaris leamaš guossi lávddis, namalassii Sara Marielle unna oabbá, Risten Anine Gaup.
– Mu mielas lea jalla somá go mii oappážat ja vieljažat leat agibeaivvi ovttas juoigan, áhčči maid juoigá ja eadni láve lávlut. Risten lea hui čeahppi ja sávan ahte besse eanet čuojahit ovttas, ahte mieđiha nuppes vuolgit fárrui, dadjá Sara Marielle, gii čilge ahte ii leat sáhka lassi miellahtuid čanastit Arvvas jovkui.
– Mun háliidan ahte ii galgga nu plánet ja čadnot. Moai letne duo, muhto lea suohtas jus sáhtte muhtimin leat joavkun.
Háliideaba maiddái duo
Risten Anine Gaup ii leamaš ovdal Arvvas konsearttas ja muitala oahpahallan luđiid dan botta go čálii skuvlabargguid.
– Lei hirbmat suohtas leat mielde. Go oabbá jearai vuolggán go Arvvas konsertii, de jáhkken vuos ahte galgen guldaleaddjin. Moai letne maid oappáin hupman dahkat duo dahje joavkku, nu ahte munnos lea goit plána eambbo bargat fárrolaga, muhto eará go Arvvas joavkku oktavuođas, muitalastá Risten Anine.
