Trøndelága fylkagirjerájus lea nominerejuvvon iežaset sámegiela barggu dihte, ja earenoamážit lullisámegielain.
Trøndelága fylkkagirjerájus lea nominerejuvvon dán jagáš girjerájusin fárrolaga Deichman Grünerløkkain ja Grimstad bibliotekain. Norgga Girjerájussearvvis lea leamaš jury mii lea nomineren dan golbma girjerádjosa vuoitit bálkkašumi.
– Dán jagi maid, nu go ovdal ge, ledje buorit evttohasat mat iešguđetge ládje leat bargan buori barggu dahje lea nu ahte geavaheaddjit liikojit girjorádjosiidda earenoamáš bures, čállá jury iežas árvvoštallamis.
Bálkkašumi vuoiti almmuhuvvo ođđajagemánu 9. beaivvi.
–Dehálaš giellaovddideapmi
Trøndelága fylkagirjerájus lea nominerejuvvon iežaset barggu dihte sámegiela ektui, ja earenoamážit lullisámegiela barggu dihte.
– Bargu man girjerájus bargá, lea dehálaš sámegielaide, ja ovddida giela. Fylkkagirjerádjosa bokte leat maid viiddidan iežaset doaimmaid ja bargagoahtán giellagádjumiin ja leat stuora ovdagovvan sihke giellaberošteddjiide, girjerádjosiidda, sámi giellabirrasiidda, sámi lohkkiide ja boahttevaš sámegielat lohkkiide, čállá jury.
Stuora ovttasbargu
Sii lohket dán barggu leat čavddis ovttasbargun sihke giellageavaheddjiiguin, dulkkaiguin, lágádusaiguin ja sámi birrasiiguin ja giellaávdnasat ovdanbuktojuvvot maid interaktiivvalaččat nu ahte dat addá beroštumi lullisámegielagiidda ja maid eará berošteddjiide.
– Sidjiide lea leamaš dehálaš joksat unnimusaid, sii geat boahtteáiggis galggaše geavahit rašes giela. Dát bargu heive bures ON giellajagi bargui, ja bargu máid girjerájus lea bargan lea máilmmidásis maid buorre bargu, ákkastallá jury.
Ilus ja vuovdnái
Girjerádjosa sámegiela fágabargi, Morten Olsen Haugen, muitala ahte sii leat hui ilus ja vuovdnát go leat nominerejuvvon dán jagáš girjerájusin. Son dadjá ahte dat mearkkaša ahte sin bargu mearkkašuvvo sin bargosuorggis.
– Mii leat diehttelasat hui ilus ja vuovdnát dáinna nominašuvnnain. Mii han háliidit bargat buori barggu, ja lea somá go olbmot mearkkašit min ja min doaimma, dadjá Haugen.
Badjel 100 girjji
Girjerájus lea leamaš mielde jorgalanbarggus go badjel 100 girjji leat jorgaluvvon lullisámegillii. Haugen dadjá ahte sii eai leat gávnnahan ruvttaid ođđasit iežaset bargguin, go sihke lágádusat ja maid oahpponeavvoguovddážat leat bargan seamma barggu go sii ovdal.
– Mii leat diehttelasat hui giitevaččat ja maid sorjavaččat dan doarjagii maid Sámediggi lea juolludan midjiide. Mii sávvat dieđusge ahte mii vuoitit bálkkašumi, ja lea gelddolaš oaidnit oažžut go mii bálkkašumi, loahpaha fágabargi preassadieđáhusas.
