-Almmuhus-
OĐĐASATÁrvaluvvo heaittihuvvot

Árvaluvvo heaittihuvvot

-

-

Ráđđehus árvala heaittihit Gaske-Nøørjen Saemienskovle, seastin dihtii 3,3 miljovnna. Dát ii lean buorre ođas skuvlii.

– Dán eat lean gal vuordán, eat leat ožžon makkárge signálaid das ahte áiggošedje heaittihit min skuvlla, lohká Gaske-Nøørjen Saemienskovle doaibmajođiheaddji Bjørn Erik Danielsen.

 

– In leat movtta

Ráđđehus árvala heaittihit Gaske-Nøørjen Saemienskovle mii lea Aarbortes Nordlánddas, 2016-17 skuvlajagi rájes. Dáinna seasttášedje 3,3 miljovnna ruvnnu.

Danielsen lea aitto lohkan Stádabušeahta, iige loga iežas geargan nu olu jurddašit dán árvalusa birra.

– Mun in dieđe eambbo go dan moadde cealkaga mii lea čállon min birra, nu ahte in sáhte vuos jierásnuvvat menddo sákka, muhto diehttelasat in leat movtta gal. Dát ii lean buorre ođas, lohká Danielsen.

 

Skuvllas lea juste dál čakčaluopmu, nu ii leat doaibmajođiheaddji beassan háleštit iežas bargiiguin.

– Lean eske sádden sidjiide e-poastta gos leat muitalan dán birra, muhto in leat gullan vel reakšuvnnaid, muitala son.

 

– Giellaoahpahus ii rievdda

Ráđđehus ákkastallá heaittiheami ovddas dainna go skuvllas eai leat leamaš fásta oahppit 2011 giđa rájes.

– Go skuvla heaittihuvvo de dat ii mearkkaš ahte vuoigatvuohta oažžut sámegiela- ja kulturoahpahusa rievdá. Dalle go ohppiin eai leat sierra oahpaheaddjit, de sis lea vuoigatvuohta oažžut molssaevttolaš oahpahusa. Dat sáhttá ovdamearkka dihtii leat gáiddusoahpahus, čállá ráđđehus Stádabušeahtas.

Danielsen duođašta ahte sis eai leat fásta oahppit, muhto oaivvilda iežaset liikká fállat dehálaš bálvalusa:

– Mii fállat dál gáiddusoahpahusa birrasiid 50 oahppái, ja dát lea dehálaš fálaldat.

 

Sávvá gullat eanet bearjadaga

Gaske-Nøørjen Saemienskovle lea dál gáiddusoahpahusskuvla mas lea vel internáhta. Skuvla čađaha 6 geardde jahkái giellačoahkkanemiid mat bistet vahkku guhtege.

– Gaske-Nøørjen Saemienskovle ii leat áidna aktevra mii fállá gáiddusoahpahusa lullisámegillii. Dán fállet maiddái Snåasa ja Plassje vuođđoskuvllat, čállá ráđđehus.

– Dat lea duohta ahte gávdnojit eará skuvllat mat maid čađahit gáiddusoahpahusa, muhto in dieđe mo ráđđehus lea jurddašan organiseret dán, vástida behtton doaibmajođiheaddji Bjørn Erik Danielsen.

Son galgá ge bearjadaga čoahkkimii Nordlándda Fylkkamánniin ja Oahpahusdirektoráhtain.

– Sávan oažžut eanet vástádusaid dan čoahkkimis, loahpaha Danielsen.

 

– Unohas go eai leat gulahallan

Sámediggeráđđi Silje Karine Muotka, geas lea oahpahussuorgi okta ovddasvástádussurggiin lohká ráđđehusa heaittihanárvalusa leat šállošahttin.

– Máhttodepartemeantta ii leat oba gulahallan ge Sámedikkiin ovdal go árvaledje dán ja mun anán dan hui unohassan. Lea lunddolaš digaštallat minguin ovdal go árvalit dákkáriid, lohká Muotka ja lohká áigut čuovvolit ášši.

– Muhto dat gulahallan maid departemeantta dál lea bidjan dán áššis, ii leat buorre.

-Almmuhus-