Ráđđehus árvala rievdadit friddjakoartaortnega ja časkit oktii iežasoassemeriid.
Preassadieđáhusas árvala ráđđehus boahtte jagi stádabušeahtas rievdadit friddjakoartaortnega. Dál leat guokte iežasoassemeari, ja daid háliida dál ráđđehus časkit oktii. De maiddái bajidit iežasoasi maid ferte máksit ovdal oažžu friddjakoartta. Jus dohkkehuvvo, de šaddá rádji 3183 ruvnno.
– Mii áigot dahkat ortnega álkibun geavaheddjiide, ja suddjet sin geain leat eanemus olggosgolut dearvvašvuođa geažil, čilge dearvvašvuođa- ja fuolahusministtar Bent Høie (O).
Opposišuvnna bealis cuiggodit árvalusa go oaivvildit ahte dat dagaha eanet goluid buhcciide. Bargiidbellodaga dearvvašvuođapolitihkalaš ságadoalli Ingvild Kjerkhol oaivvilda ahte rievdadus ollislaččat dahká divraseabbon leat buohccin, NRK dieđuid mielde.
– Dasa lassin lea lassáneapmi 250 ruvnno eanet go obbalaš haddegoargŋun. Dat šaddá liigenođđun sidjiide geat dárbbahit dálkasiid ja lea vuđolaččat vuoigatmeahttun, cealká Kjerkhol NRK:i.
