Guovddášbellodat árvala loktet ahkemeari oastit snuvssaid ja duhpáha 18 jagis 20 jahkái.
Guovddášbellodat árvala loktet ahkemeari oastit snuvssaid ja duhpáha 18 jagis 20 jahkái.
Ovttajienalaččat mearridii Guovddášbellodaga prográmmalávdegoddi bajidit ahkemeari oastit snuvssaid ja duhpáha.
Sii háliidit loktet ahkemeari 18 jagis 20 jahkái.
– Duhpátgeavaheapmi lea dat ovttaskasfáktor Norggas mii váikkuha eanemus dearvvašvuođaváttuide, danin oaivvildat ahte berre bajidit ahkemeari ja bidjat johtui eanet doaibmabijuid mat buoredivčče álbmotdearvvašvuođa, lohká Guovddášbellodaga dearvvašvuođapolitihkalaš ságadoalli Kjersti Toppe TV2:i.
Árvalit maid loktet hattiid
Guovddášbellodaga prográmmalávdegoddi árvala maid seamma go dearvvašvuođaministtar Bent Høie.
Sii dáhtot loktet duhpáthattiid ja gieldit máidnosiid bidjamis duhpátpáhkaide.
Vaikke prográmmalávdegoddi lea ovttajienalaččat mearridan dán, de jáhkká Toppe bellodaga riikkačoahkkimis gártat dán digaštallat giđđat.
Ii doarjjo
Guovddášbellodaga prográmmalávdegotti árvalus bajidit ahkemeari oastit duhpáha ja snuvssaid suhttada Ovddádusbellodaga Bård Hoksrud.
– Dá lea moralisttalašárvalus Guovddášbellodagas man rievtti mielde galggašii bálkestit ruskalihttái, lohká stuoradiggeáirras.
