-Almmuhus-
-Almmuhus-
OĐĐASAT Árvalan alcce­seaset namaid nuortalaš­gillii, bihttán- ja ubmi­sámegillii

Árvalan alcce­seaset namaid nuortalaš­gillii, bihttán- ja ubmi­sámegillii

-

-

Norgga Sámiid Riikkasearvvi stivra árvala organisašuvnna meannudit almmolaš namaid maiddái nuortalaš-, bihttán- ja ubmisámegillii.

Riikkastivra árvala Taar Säʹmmlai Meersaž Kõõskõs-seäʹbrr (nuortalašgillii), Vuona Sämij Rijjkasäbbre (bihttánsámegillii) ja Nürjen Sämij Rïjkkaseäbrrie (ubmisámegillii) NSR ođđa almmolaš namman.

NSR liigejahkečoahkkin mii lágiduvvo digitálalaččat ođđajagimánu 30. ja 31. beivviid, dat galgá meannudit namaid. 

— Norgii gullet guhtta sámi giellaguovllu, ja lea lunddolaš ahte NSR galgá leat mielde árvvus atnit ja nannet maiddái daid unnit sámegielaid. Mun lean ilus go mii NSR:s dál dahkat dán lávkki, ja meannudat namaid nuortalaš-, bihttán-, ja ubmisámegillii, lohká NSR-jođiheaddji Runar Myrnes Balto preassadieđáhusas.

Sus lea jáhkku ahte riikkačoahkkin ovttajienalaččat dohkkeha dáid namaid oktanas go dahket eará rievdadusaid organisašuvnna njuolggadusain.

 — Garra dáruiduhttima geažil, ja maiddái rádjábidjamiid ja go bákkuin sirde sápmelaččaid, leat muhtin gielain unnán dahje ii oktage geavaheaddji Norggas dál. Lihkus dahkko olu dehálaš bargu ealáskahttin dihtii ja áimmahuššan dihtii dáid gielaid. 2019:s oaččuimet earret eará vuosttaš almmolaš bihtánsámegiel ortografiija, joatká Myrnes Balto.

Dáhttot Norgga čuovvolit

Sihke Myrnes Balto ja NSR riikkastivra oaivvildit dál leat áiggi láddan dasa ahte almmolaš Norga ge čuovvula sin.

Ráđđehusas lea dál gulaskuddamis árvalus ahte meannudit almmolaš namaid Norgga gonagasriikii davvisámegillii, lullisámegillii ja julevsámegillii.

— Iežamet gulaskuddanvástádusas gieldadepartementii, čállit maiddái ahte Norga maid ferte meannudit almmolaš namaid nuortalašgillii, bihtánsámegillii ja ubmisámegillii. Lea hui buorre go mii viimmat oažžut almmolaš namaid Norgii sámegielaide ja mii jurddašat ahte de lea buorre liiba dohkkehit buot guhtta sámegiela Norggas, lohká NSR-jođiheaddji.

-Almmuhus-