-Almmuhus-
-Almmuhus-
SMÁVVAOĐĐASATArne Kristian Vestre árva­luvvo jođihit Nordkalott­folket

Arne Kristian Vestre árva­luvvo jođihit Nordkalott­folket

-

-

Nordkalottfolket bellodat lea ohcame ođđa jođiheaddji maŋŋel go Toril Bakken Kåven dieđihii son heaitá. 

Nordkalottfolket vállje ođđa jođiheaddji riikkačoahkkimis mii lea geassemánu 12. beaivvi. Bellodat čállá preassadieđáhusas ahte bellodaga válgalávdegoddi lea evttohan 44- jahkásaš Arne Kristian Vestre ođđa jođiheaddjin.

– Buoremus dálkasa gávnnat luonddus. Dat dearvvašmahttá ja buktá návccaid, dadjá son.

Duogáš mearraindustriijas

Vestre boahtá Láhpi suohkanis, lea náitalan ja sus leat njeallje máná. Son lea oahppan maskinista ja skiippahoavda. Son lea borjjastan fatnasiin 12 jagi olu mearain ja bargan skiippahuksemis Duiskkas, Turkus ja Norggas. Son lea goalmmát buolvvas geat Ákšovuonas barget bearašfitnodagas mii dál lea sihke rederiija ja divohatindustriija, namalassii Barents Nord rederiija mas dál leat golbma fatnasa Silbeco Nordicas Stiertnás.

Loga maid:
Toril Bakken Kåven heaitá jođi­headdjin

Vestre lea dál Frydenbø Industri direktevra guovtti davimus fylkkas. Son lea jođihan Kåven Jeger- og fisk bivdosearvvi maŋemus vihtta jagi, ja lea áŋgiris meahcásteaddji gii viežžá luondduriggodagaid sihke iežas fámuiguin ja mohtorfievrruiguin, čállet preassadieđáhusas. 

– Arne Kristian lea mearkkašahtti barggu bargan bellodagas, ja sus lea erenoamáš beroštupmi oažžut ássanmovtta ja bargosajiid davás. Sus lea mávssolaš duogáš go ieš boahtá unna riddoservodagažis gos rahčet hástalusaiguin eretfárremiin. Son orru bures heiveme jođihit min dán gelddolaš áigodaga mas mii leat dál, dadjá válgalávdegotti jođiheaddji Kjetil Romsdal. 

Áigumušat

Arne Kristian Vestre lea maid Sámedikki várrelahttu, ja oaidná stuora vejolašvuođaid iežaset bellodahkii ain viidáseappot.

– Nordkalottfolket ovdáneapmi lea okta dain deháleamos dáhpáhusain davvin, ja mun jáhkán mis lea duohta váikkuhanvejolašvuohta eiseválddiid hárrái. Mis leat oanehis mearráduslinját, ja áibbas eará organisašuvdnakultuvra go eará bellodagain. Min eai dárbbat lulde dohkkehit go dáhttut buoremus čovdosiid davás, dadjá Vestre preassadieđáhusas. 

-Almmuhus-