Sámi juoigi Sara Marielle Gaup Beaska ovttas eará eamiálbmotmusihkkáriiguin doallá konsearta ovttas jiekŋačuojaheddjiin Terje Isungsetiin Førde festiválas, guovdu geasi.
Sámi juoigi Sara Marielle Gaup Beaska ovttas eará eamiálbmotmusihkkáriiguin doallá konsearta ovttas jiekŋačuojaheddjiin Terje Isungsetiin Førde festiválas, guovdu geasi.
Terje Isungset lea musihkkár gii čuojaha jiekŋačuojanasaiguin ja lea bargan dan máŋga jagi.
Boahtte geasi čuojaha son Førde árbevirolaš ja máilmmimusihkkafestiválas ovttas inuihttalávluiguin Beatrice Deer ja Evie Mark, Kanadas eret, lávluin ja multiinstrumentalisttain Radik Tyuliyush (lávlu Huun-Huur-Tu joavkkus) Tuvas Ruoššas eret, juigiin Sara Marielle Gaup Beaska ja Maria Skranes.
Áidna máilmmis gii čuojaha dakkár čuojanasain
Isungset lea áidna jiekŋačuojaheaddji, ja son čatná árktalaš guovlluid ja musihka oktii go čohkke kanadalaš, ruošša ja sámi musihkkariid ja ráhkada sierra musihkka univearsa Førdes. Su čuojanasat leat vižžon jiehkis ja ráhkaduvvon jieŋas.
Báhtareami birra
– Førde festivála áigu dán jagi čalmmustahttit kultuvrralaš riggodaga ja máŋggabealatvuođaid riikkain gos lea soahti, garra riidu ja heahti, muitala direktevra Hilde Bjørkum.
Son čujuha daid riikkaid čábbodahkii ja kultuvrii, ja muittuha buohkaid ahte johtin lea buot áiggiid báidnán ja ovdánahttán servvodaga ja kultuvrra.
«Báhtareame!» lea fáddán dán jagi Førdefestiválas mii lea álggus suoidnemánu, ja festivála lágiduvvo 27. geardde. Gonagaslaš allatvuohta Mette-Marit lea festivála alimus várjaleaddji.
