-Almmuhus-
KULTUVRAÁrktalaš Álgo­álbmot Filbma­foanda almmuha ambassa­devrraid

Árktalaš Álgo­álbmot Filbma­foanda almmuha ambassa­devrraid

-

-

Nikolaj Coster-Waldau, Nukâka Coster-Waldau ja Baltasar Kormákur čohkkejit searaideaset ovdánahttin dihtii árktalaš álgoálbmot filbmadahkkiid ođđa buvttadan-ja ovdánahttinfoandda.

The Arctic Indigenous Film Fund dahje Árktalaš Álgoálbmot Filbmafoanda (AIFF) almmuha dál iluin ahte beakkán filbmadahkkit ja neavttárat Nikolaj Coster-Waldau (Game of Thrones, Guovdageainnu stuimmit),  Nukâka Coster-Waldau (Anori, Forbrytelsen, Thin Ice) ja Baltasar Kormákur (Everest, Adrift, Katla) leat foandda vuosttaš ambassadevrrat dahje verddet.

Nu čállá Árktalaš Álgoálbmot Filbmafoanda preassadieđáhusas.

Foandda verdden áigot sii leat veahkkin ovddidit ja dovddusin dahkat AIFF filbma- ja TV-industriijas ja vejolaš ruhtadeddjiid gaskkas iežaset ruovttuguovlluin ja máilmmiviidosaččat.

Árktalaš Álgoálbmot Filbmafoanda, man Internašunála Sámi Filbmainstituhtta lea ásahan, lea ođđa foanda, man áigumuš lea ovdánahttit álgoálbmot filbmadahkkiid árktalaš guovlluin ja doarjut sin filmmaid, TV-ráidduid ja eará buvttademiid.

Jiena oažžut gullot

Golbma beakkán ambassadevrra čállet oktasaš cealkámušas ahte sii leat ilus ja rámis go besset doarjut Árktalaš Álgoálbmot Filbmafoandda.

– Mis buohkain leat čanastagat árktalaš guovlluide sihke persovnnalaččat ja iežamet barggu oktavuođas ja mii diehtit man olu čehppodat dáppe gávdno. Álgoálbmogiid jietna galgá gullot ja árktalaš guovlluin leat mávssolaš, hui dehálaš ja fámolaš muitalusat maid máilbmi ii leat vuos ovdal beassan gullat ja oaidnit. Mii sávvat ahte AIFF lihkosnuvvá iežas áigumušaiguin doarjut álgoálbmot filbmadahkkiid,nu ahte nagoda leat mielde gokčamin váilevaš ruhtadeami daid dáiddáriid prošeavttain, čállo preassadieđáhusas.

Ohcet internašunála ruhtadeddjiid

Foanda lea dál háhkagoahtán internašunála ovttasbargoguimmiid ja ruhtadeddjiid. Dálá ovttasbarggu bokte, mas leat mielde Internašunála Sámi Filbmainstituhtta, Canada Media Fundja Telefilm Canada, lea AIFF aiddo juolludan vuosttaš ovdánahttindoarjagiid muhtin filbmamáilmmi gelddoleamos ođđa bagadalliide. Sii leat Kelvin Redvers (Kanada, Ice Road), Pipaluk K. Jørgensen (Ruonáeanan, His Road Of Mine), Marja Bål Nango (Norga, I Love My Guođoheaddji), Eduard Novikov (Sakha republihkka, At The End Of The World) ja Nyla Innuksuk (Kanada, Slash/Back). Dáid prošeavttaid lassin doarju AIFF maid Arctic Chills balddonasfilbmačoakkáldaga.

Ceavzilis ovdáneami 

Internašunála Sámi Filbmainstituhta direktevra Anne Lajla Utsi lohká árktalaš guovlluid álgoálbmotmuitalusaid sáhttit čalmmustahttit ja movttiidahttit máilmmi jurddašit ceavzilis ovdáneami boahtteáiggis.

– Min muitalusaid bokte sáhttet studioide ja sáttamediaide rahpasit mearehis stuorra vejolašvuođat, seammás go geahččit miehtá máilmmi besset oaidnit gelddolaš álgoálbmotmuitalusaid. Mii leat hui rápmásat ovttasbargguin Nikolajain, Nukâkain ja Baltasarain ja joatkit iežamet dehálaš bargguin ovdánahttit álgoálbmotmuitalusaid ja doarjut álgoálbmot filbmadahkkiid. Lea nu olu vuordimis, dadjá Utsi preassadieđáhusas. 

-Almmuhus-