Árja áigu leat vuosttaš bellodat mii searvá buot golmma sámediggeválgii. Sii áigot dál viiddidit bellodaga sihke Suoma- ja Ruoŧa beallái Sámi.
Árja lea ráhkkaneame searvat buot golmma sámedikki sámediggeválgii. Sii áigot dál ásahit bellodaga maiddái Suoma- ja Ruoŧa beale Sápmái. Sii áigot vuosttaš bellodahkan searvat buot golmma válgii. Dan sii dieđihit preassadieđáhusas.
Viiddidit bellodaga
– Árja lea máŋga jagi árvvoštallan ja lea dál mearridan ásahit Árjja bellodaga sihke Suoma ja Ruoŧa beale Sápmái. Mun lean hui ilus go Ruoŧa ja Suoma beale sápmelaččat leat ávžžuhan min viiddidit iežamet bellodaga doaimma maid min ránnjáriikkaide. Dál, 2017:s, go sápmelaččat ávvudit 100-jagi sámepolitihkalaš áŋgiruššamiid, de heive ge hui bures almmuhit Árjja ođđa áigumušaid, dadjá Árjja presideantaevttohas Inger Eline Eriksen.
Bovdejit searvat
Árja searvá Ruoŧa beale sámediggeválgii njealji jagi geahčen ja Suoma boahtte sámediggeválgii go leat ásahan bellodaga Suoma beale Sápmái.
Sii bovdejit dál Ruoŧa ja Suoma beale sápmelaččaid searvat miellahttun bellodahkii, ja áigot ásahit sierra bargojoavkku mii galgá gulahallat berošteddjiiguin.
Sii áigot maid gulahallat bellodagaiguin mat leat jo Ruoŧa Sámedikkis, ja válljejuvvon Suoma sámediggeáirasiiguin, gullan dihte lea go beroštupmi searvat Árjja bellodahkii boahtte sámediggeválggas.
– Sámit leat okta álbmot, ja aiddo sohppojuvvon Davviriikkaid Sámekonvenšuvdna deattuha ahte sámedikkit galget beassat nannet rájiidrasttildeaddji ovttasbarggu. Árja háliida leat vuosttaš sámi bellodat mii searvá sihke Norgga, Ruoŧa ja Suoma sámediggeválgii. Vaikko Suoma beale Sámedikkis eai leat dál bellodagat, de bovdet mii Suoma beale sápmelaččaid searvat Árjja bellodahkii vai mii fárrolaga sáhttit nannet sápmelaččaid vuoigatvuođaid. Árjja ođđa prográmmas lea oppasámi vuolggasadji min politihkkii, dat galgá bures heivet sápmelaččaide Ruoŧas ja Suomas, dadjá Eriksen.
