-Almmuhus-
OĐĐASATArctic Superstar vuoitán Murmánskkas

Arctic Superstar vuoitán Murmánskkas

Journalista

-

-

Dokumentárafilbma Nils Rune Utsi birra vuittii «buoremus álgodokumentára» bálkkašumi Murmánskka filbma- ja TV-festiválas.

Dokumentárafilbma sámi ráppára Slincraze, dahje Nils Rune Utsi, birra lea ožžon olu fuomášumi miehtá máilmmi. Stuora olgoriikka filbmamagasiinnat leat rámpon filmma, ja filbma lea maid nominerejuvvon vuoitit dán jagáš dokumentárabálkkašumi Cinema Scandinavia Awards.

 

Filbma čuovvu Nils Rune Utsi, go geahččala birget sámi ráppain. Mannan vahkkoloahpa filbma vuittii «buoremus álgodokumentára» bálkkašumi Northern Character filbma- ja TV-festiválas Murmánskkas.

Simen Braathen lea ráhkadan filmma ráppára birra, ja lea nammaduvvon okta dain logi buoremus musihkkadokumentárafilmmain máilmmis dán jagi, Vice Magazines.

Konsearta man Slincraze doalai Murmánskkas lei spagga dievva, čállá festiválkoordinahtor Hilde Korsæth preassadieđáhusas.

 

Sámi filmmat maid vuite

Maiddai eará sámi filmmat vuite bálkkašumiid. Anne Kristine Rikardsen filbma «Mirakeljentas selfie» vuittii vuosttašdiploma Mánáid- ja nuoraidfilbmakategoriijas. Dat lea okta oassi NRK Sámi TV-ráiddus ieŽár.

Elle-Máijá Tailfeathers vuittii vuosttašdiploma álgodokumentára kategoriijas, «Bihttoš» filmmain.

 

Muđui ledje olu Norgga filmmat mat vuite bálkkašumiid. Filbma «En prest og en plage» Davvi-Norgga báhpa Børre Knudsena birra, vuittii Northern Characters Grand Prix bálkkašumi. Filbma man Fridtjof Kjæreng lea ráhkadan, attii buori gova Northern Character juryi.

 

Olu filmmat boahtán

73 filmma dan 140 sisasáddejuvvon filmmas, besse gilvoprográmmii mielde Murmánskkas. Filmmat bohte miehtá Ruošša, ja eará riikkain nu go Norggas, Ruoŧas, Suomas, Frankriikas, Latvias, Georgias, Bosnia ja Herzegovinas, Ukrainas, Ghanas ja Egyptas.

– Festiválavahkkus dáhpáhuvvá olu, ja mii dovdat dego oassin filbmamáilmmis. Olbmot poláraguovlluin besset oaidnit makkár eallin davviguovllu olbmuin lea, lohká festiválahoavda Svetlana Soldatova.

 

NRK Romsa vuittii guokte bálkkašumi:

Helga Bones ja Harald Albrigtsen filbma «Et eventyr gjennom linsa» vuittii buoremus TV-prográmma bálkkašumi.

Mathias Høyem filbma «Operasjon Nansen» vuittii buoremus nuoraidprográmma bálkkašumi.

 

Eará Norgga filmmat mat vuite:

Rachel A. Gomez filbma «Liquid Wonderworld» vuoittii gudnediploma dokumentárafilbmakategoriijas.

Ida Gullvik ja Kai Erik Bull filbma «Asylstrømmen» vuittii goalmmátdiploma.

Endre Skanfer filbma «Dunder» vuittii nuppidiploma.

-Almmuhus-