Boahtte jagi manná Arctic Race of Norway Lofuohta ja Viestterállasa meattá ovdal go de maŋemus kilomehteriid galget duolmmastit gaskal Lodega ja Áhkánjárgga.
Arctic Race of Norway duhtavaš beaivválaš jođiheaddji, Knut-Eirik Dybdal, almmuhii Agenda Nord-Norge konferánssas ikte gokko boahtte jagi sihkkelgilvu manná.
– Mii leat dan maŋemus guhtta gaskka bidjan buot regiovnnaid meattá Davvi-Norggas. Juohke sajis leat váldán min bures vuostá, ja sihkkelastiin leat buorit muittut báhcán. Dál leat ilolaččat go máhccat ruovttoluotta gos álggiimet 2013:s, dadjá Dybdal preassadieđáhusas.
TV-govat miehtá máilmmi
Dán jagi sáddejuvvojedje sihkkelgilvvu govat máŋggaid miljovnnaide go 190 riikka oidne daid TV:s. Dybdal illuda fas beassat čájehit Davvi-Norgga internationála gehččiide.
– Mii leat gaskkustan TV-govaid dán čáppa riikaoasis miehtá máilmmi, ii ge leat várra čiegus ášši ahte Lofuohtta ja Viestterálas leat erenoamáš báikkit. Mii illudit fas čájehit máilbmái dan čáppa luonddu, ja daid fiinna olbmuid geat dáppe orrot, dadjá Dybdal.
Dorjot Davvi-Norgga MM-kandidáhta
Arctic Race of Norway beaivválaš jođiheaddji oaivvilda ahte sihkkelgilvu ii leat soaittáhagas biddjon Áhkánjárgga alpinrusttega lusa. Boahtte vahkku sáhttá Davvi-Norga ja Áhkánjárga válljejuvvot Norgga kandidáhttan lágidit máilmmimeašttirgilvvuid alpintas 2027:s.
– Arctic Race of Norway lea šaddan sukseassan danne go olles Davvi-Norga lea leamaš duohken ja ovttasbargan. Dál čuožžut buohkat Áhkánjárgga duohken Davvi-Norgan ja sávvamis lea olles Norgga kandidáhtta lágidit máilmmimeašttirgilvvuid alpintas, dadjá Dybdal.
Positiiva politihkkárat
Stádaministtar Erna Solberg ja Nordlándda fylkkaráđi jođiheaddji, Tomas Nordvoll, searvvaiga ovdanbuktimii. Fylkkaráđi jođiheaddji namuha earenoamážit lassiváikkuhusaid mat gusket Davvi-Norgga ealáhusaide.
– Lea stuora gudni ovddastit olles Davvi-Norgga go dajan ahte Arctic Race of Norway lea olu eambbo go dušše sihkkelgilvu. Mii leat dieđusge hui čeavlát go min riikaoassi sáhttá leat doallogoddi dakkár valáštallanlágideamis internationála dásis, muhto Arctic Race of Norway lea maid šaddan dehálaš reaidun riikaoasi ovdáneapmái.
Ođastan ovttasbargošiehtadusaid
Arctic Race of Norway lea ođastan ovttasbargošiehtadusaid golmma jahkái SeastinBáŋku 1 Davvi-Norggain ja Telenorain. SeastinBáŋkku šiehtadus dagaha ahte duháhiid mielde mánát miehtá Davvi-Norgga besset searvat SNN Mini Arctic Race gilvui. Telenora šiehtadus dagaha fas buoret 4G-oktavuođa luottaid mielde, mii dagaha buoret dili TV-buvttadeapmái.
