-Almmuhus-
OĐĐASATÁppain olahit dobbeliidda

Áppain olahit dobbeliidda

-

-

Logi jagi áigi ráhkadii Porsáŋggu gielda ja Sámi giella- ja kulturguovddáš guokte sámegiel frásasátnegirjji. Dál leat digitaliseren sátnegirjjiid ja almmuhan sierra áppa mainna olahit vel eambbosiidda.

Porsáŋggu gielda ja Sámi giella- ja kulturguovddáš leaba ođasmahttán sámegiel frásasátnegirjjiid maid buvttadedje 2007/08.


VUORDÁMUŠAT: Sámi giella- ja kulturguovddáža beaivválaš jođiheaddji Sara Stødle muitala ahte oallugat leat geavahan frásasátnegirjjiid ja ahte geavaheaddjit leamaš duhtavačča. Dál sávvá ahte olbmot maiddái váldet bures vuostá áppa maid leat ráhkadan. Vuorkágovva

– Dál lea digitála áigi, ja gávnnaheimmet ahte heive ođasmahttit ja ráhkadit áppa sámegiel frásasátnegirjjiin. Dál olahit vaikke buohkaide miehtá máilmmi, dadjá Sámi giella- ja kulturguovddáža beaivválaš jođiheaddji Sara Stødle.

 

Bargoneavvu

Logi jagi áigi ráhkadii Porsáŋggu gielda ja Sámi giella- ja kulturguovddáš guokte sámegiel frásasátnegirjji mat galge veahkkin bargiide sihke dearvvašvuođasuorggi ja mánáid- ja nuoraidsuorggis.

– Midjiide lea muitaluvvon ahte oallugat leat geavahan frásasátnegirjjiid ja geavaheddjiid mielas leamaš sátnegirjjážat ávkkálačča. Frásasátnegirjjit leat dan mađe unni ahte čáhket lupmii, muitala Stødle.

 

Bissu ain lupmas

Vaikke frásasátnegirjjážat leat ođasmahtton ja digitaliserejuvvon, de čáhket dat ain lupmii.

Frásasátnegirjjiid áppa beassá oainnat viežžat iežas telefovdnii.

Dát lea nuvttá ja heive sihke androida ja apple telefovnnaide.


GIRJJIT: Dá leat girjjit maid vuođul ođđa áppa lea ráhkaduvvon. Sátnegirjjážat leat dan mađe smávva ahte čáhket lupmii, ja nu lea maiddái mátketelefovdna man bokte dál beassá ohcat sániid ja dajaldagaid. Govven: Sara Stødle/Sámi giella- ja kulturguovddáš

– Leamaš ádjás bargu digitaliseret frásasátnegirjjiid. Mii leat golmmas bargan dáinna ja jáhkkán iežamet lihkostuvvan. Mii leat lohkan ja dárkkistan giela, ja dál eai galggaše čállinmeattáhusat, dadjá Sámi giella- ja kulturguovddáža beaivválaš jođiheaddji Sara Stødle.

 

Sávvá olbmuid geavahit

Frásasátnegirjjiid áppa lea gieskat almmuhuvvon.

Das gávdnojit sánit ja dajaldagat maid olmmoš dárbbaša árgabeaivvis.

Dál sávvá buvttadeaddji ahte olbmot geavahit veahkkeneavvu.

– Mis leat vuordámušat ahte olbmot geavahit áppa. Dát lea maiddái veahkkeneavvun sidjiide geat leat oahpahallamin sámegiela go mii leat áppii čállán mo sániid ja dajaldagaid dadjá. Áppa heive erenomáš bures daid guovllu olbmuide gos sámegiella ii leat nu nanus, loahpaha Stødle.

 

-Almmuhus-