Sámiráđđi searvá buvttadit áppa mainna sáhttá sámegiela oahppat.
Sámiráđđi lea fárus ruhtaduvvon prošeavttas EU Erasmus + prográmmas mas ulbmilin lea buvttadit áppa mainna sáhttá earret eará sámegiela oahppat. Jurdda lea ahte váldogielaid, nugo Eŋgelasgiela, Spánskkagiela, Suomagiela, Ruoŧagiela, Dárogiela ja Ruoššagiela bokte galgá sáhttit oahpahallat unnitlogugielaid: Davvisámegiela, Gáliskgiela, Skohttalašgiela, Kornálašgiela, Báskárgiela ja Galisálašgiela, čállá Sámiráđđi preassadieđáhusastis.
4000 sáni, 700 frása ja 20 báddejuvvon ságastallama
Áppas galget leat badjel 4000 sáni, 700 frása ja 20 báddejuvvon ságastallama. Das galgá leat vejolašvuohta grammatihka hárjehallat, árvádusaid vástidit ja galgá maid leat sierra kulturoassi, mas gávdná dieđuid sámi kultuvrra birra.
— Mii leat hui movttegat go leat dál ON álgoálbmogiid giellajagis sáhttán dákkár mávssolaš prošektii searvat. Mis lea doaivva ahte áppa movttiidahttá eambbosiid oahpahallat sámegiela, go dasa lea dárbu, deattuha Sámiráđi presideanta Åsa Larsson Blind.
Ilbmá 2021 čavčča
Áppa buvttadan bargu lea aiddobeliid álgán, ja gárvána easkka 2021 čavčča. Áppa boahtá leat nuvttá buot geavaheddjiide.
Prošektii leat searvan: Sámiráđđi, Heriot-Watt University, Learnmera oy, Cornwall council ja Asociación Moviéndote.
