-Almmuhus-
-Almmuhus-
OĐĐASAT Áŋgirit barget oažžut eambbo ohppiid ollašuhttit joatkkaskuvlla

Áŋgirit barget oažžut eambbo ohppiid ollašuhttit joatkkaskuvlla

-

-

Finnmárkku fylkkagieldda oahpahusossodat bargá áŋgirit oažžut eambbosiid válbmet joatkkaskuvlla. 

Oahpahusossodat čađaha dán vahku daid fásta jietna-/govvačoahkkimiid ovttas Finnmárkku fylkkagieldda ohppiidbálvalusain.

Ulbmil  fásta gulahallančoahkkimiiguinn lea oažžut eambbo nuoraid čađahit joatkkaskuvlla, čállá Finnmárkku fylkkagielda preassadieđáhusas. 

Čađahuvvojit fásta fierpmádatčoahkkimat juohke guđat vahku, doppe besset skuvllat buktit ovdan iežaset vásáhusaid, buriid rutiinnaid ja ovttas digaštallat iešguđetge čuolmmaid mat gusket buohkaide ohppiidbálvalusas. 

 

Veahkehit ohppiid

Finnmárkku ohppiidbálvalusas lea ovddasvástádus dieđuid juohkit ja bagadallat boahttevaš oahpuide ja fidnofágaide, ja maiddái čuovvulit ohppiid ja fidnohárjehallit geain lea dárbu oažžut veahki skuvllas dahje oahppofitnodagas, dahje jus oahppi lea jurddašan heaitit skuvllas. 

Ohppiidbálvalus ovttasbargá PPT:in ja dearvvašvuođadivššáriin. 

Ohppiidbálvalusas lea fágaoahpahuskoordináhtor,  čuovvulanbálvalus,  karriearabagadalli ja sosiála pedagogalaš bagadallii. 

 

Mávssolaš juogadit vásáhusaid

Čoahkkin doaibmá dainna lágiin ahte jietna-/govvačoahkkin dollojuvvo guovtte geardde mas lea seamma fáddá ja agenda, nu ahte buohkat besset oassálastit dan áigodagas go sidjiide heive buoremusat. 

Dán vahkku leat 30 oasseváldi skuvllain oassálastime. Go dollet dakkár gulahallančohkkimiiid, de besset deaivvadit dávjá, nu ahte mátkkoštangolut eai gártta.

– Fylkka koordineren gulahallančoahkkimiin váikkuha dasa ahte skuvllat besset deaivvadit ja vai dat iešguđetge barggut šaddet čielgaseabbon earáide. Oasseváldiid mielas lea mávssolaš juogadit vásáhusaid ja oahppat nubbi nuppis.

Go dovddadit nubbi nuppiin, de besset maid ávkkástallat guhtet guoimmiset máhtuin ja jođánit bargat ohppiiguin. 

Fáttát maid čoahkkimis áigot váldit ovdan leat nationála áŋgiruššan, skuvlla/ohppiid váikkuheapmi, oahppit geat jurddášit heaitit, ohccit geain ii leat oahpposadji, psyhkalaš dearvvašvuohta, karriearaválljen ja gelbbolašvuođalokten.

-Almmuhus-