Sámi árvvut lea juohkán Sámi árbevirolaš dieđu bálkkašupmi 2020 ovddas, ja dán háve lei anársápmelaš Ella Sarre gii oaččui bálkkašumi.
– Dát lea dakkár bálkkašupmi man dat searvi juohká dakkár olbmui dahje olbmuide geat hálddašit sámi árbevieru ja árbedieđu ja diesa gullevaš áššiid hui bures. Maiddái dan ahte olmmoš lea juohkán dán árbedieđu viidáset iežas servodagas ja oassálastán áŋgirit kultuvrra seailluheapmái iežas bargguin ja ovdamearkkain, muitala searvvi ságadoalli Petra Biret Magga-Vars preassadieđáhusa bokte.
Son čállá ahte eai láve juohke jagi juohkit bálkkašumi go searvi ferte háhkat vuos ruđa. Dat gii dál oažžu bálkkašumi lea giella- ja duodjemeašttir Ella Sarre, gii lea goalmmát gii oažžu dakkár bálkkašumi. Son oažžu bálkkašumi earret eará dan dihte go son lea máŋggabealálaččat ovddidan anársámiid kultuvrra.
– Ella Sarre deavdá sámi árbevirolaš dieđu bálkkašumi eavttuid earenoamáš bures ja Sámi árvvut -searvvis lea illu ja gudni geiget bálkkašumi ná ánssolaš sámi árbevirolaš dieđu eaiggádii, čállá Petra Biret Magga-Vars preassadieđáhusas.
Magga-Vars muitala ahte sii bivdet sámi álbmoga namuhit olbmuid geat sáhttet ánssášit bálkkašumi, ja dadjá ahte lea buorre aktiviseret álbmoga. Son dadjá ahte leat ožžon sihke Suomas, Ruoŧas ja Norggas nominašuvnnaid ja sávvá seamma boahtte háve.
Ovddidan anárašsámegiela
Ella Sarre lea ollen olu bargat iežas kultuvrra ovddas. Son lea 2012:s almmuhan giehtagirjji «Anarâš pivtâstem», mii lea girji mii muitala anársámegillii duodjeárbevieru birra. Dasa lassin lea doallan kurssaid earret eará Anára álbmotallaskuvllas ja Sámi oahpahusguovddážis.
Dainna lágiin lea son maid leamašan bálggesčuolli anárašgiela ovddideapmái. Preassadieđáhusas čuožžu ahte Sarre ii bargga mediafuomášumi ovddas, muhto vai kultuvra ja árbevierru bisuhuvvo. Son maid lea doaimmahan «Anarâš saavah», mii lei vuosttaš rádioprográmma anárašgillii.
Korona dihtii eai sáhttán lágidit doaluid gos geigejit bálkkašumi, muhto Petra Magga-Vars lea addán bálkkašumi priváhta dilálašvuođas.
Ávvir lea geahččalan oažžut oktavuođa Ella Sarrein, muhto ii leat lihkostuvvan.
