Ámmun Johnskareng čuojahii oahpes ja dovddus lávlagiid márkanguovddážis odne, ja guossit festiválalávus besse juoiggastit mielde oahpes luđiide. GEAHČA VIDEO.
Ámmun Johnskareng čuojahii oahpes ja dovddus lávlagiid márkanguovddážis odne, ja guossit festiválalávus besse juoiggastit mielde oahpes luđiide. GEAHČA VIDEO.
Dán jagi ledje maid Sámi Musihkkafestiválas doalut festiválalávus Guovdageainnu márkanguovddážis. Guhkesbearjadaga veaigin doalai Ámmun Johnskareng minikonseartta festiválalávus.
– Hávskes boddu
Konsearta mii Ámmunis lei festiválalávus lea su áidna konsearta Guovdageainnus dáid beassážiid, ja ledje eanas turisttat geat ledje boahtán lávvui ja lávu olggobeallái gullat su.
– Lei hávskes boddu ja earenoamáš dollagáttis doallat konseartta. Mun liikon dákkár minikonsearttaid doallat dán áigge, lohká Ámmun, gii váillahii eambbo báikki olbmuid konsearttas.
Dovddus ja oahpes lávlagat
Sii geat ledje boahtán konsertii besse gullat Ámmun Johnskarenga dovddus ja oahpes lávlagiid. Lávlagiiguin váldá Ámmun guldaleddjiid mielde moaddelot jagi maŋos, go su lávllateavsttat leat olu dan birra movt sápmelaččat leat bargan sámi rivttiid ovddas.
Lávvukonsearttas besse ge guldaleaddjit gullat lávlagiid nugo «Dårlig dárogiella», «Sámepolitihkkar» ja «Okta unna muittuš».
Geahččit besse vel gullat luođi birra ja juoiggastit mielde go rohttehii «Sámiid ædnan», mainna Mattis Hætta ja Sverre Kjeldsberg searvvaiga Eurovision Song Contestii 1980s.
