Ámmátjournalistat dovdaba iežaska eahpevuoiggalaččat meannuduvvon

Journalista ja ovddeš NRK-Sámi bargi Magne Ove Varsi, celkkii eret virggistis go ii ožžon jahkái lobi eará NRK kantuvrras bargat, ii ge ožžon virgelobi bálkká haga ge, čállá Journalisten fáganeahttabáiki. Su bargosadji lei NRK Sámi kantuvrras Marienlystas Oslos.

Ođđa bargái eará eaktu

Varsi hirpmahuvai daid ođđa eavttuid dihte go NRK Sápmi almmuhii su virggi rabasin. Vars muitala Journalistenii ahte almmuheamis bođii ovdan ahte ohcci sáhttá bargat eará guovllus, jus ohccis lea erenoamáš gelbbolašvuohta.

Dat lei dakkár eaktu maid Varsi ii lean ožžon dohkkehuvvot go ozai lobi bargat eará guovllus. Son lei ohcan bargat Møre og Romsdalas dahje Troanddimis, dasa ii loga NRK Sámi miehtan.

NRK Sámi ođasredaktevra Jan Rune Måsø čilge áššis ahte virgi mii dál lea almmuhuvvon rabasin, lea Marienlystas Oslos, muhto rahppo vejolašvuohta bargat NRK Sámi eará báikkálaš kantuvrrain. Sis ii leat báikkálaš kantuvra Møre og Romsdalas, dahje Troanddimis.

Ii dovdan árvvu gelbbolašvuođas

Journalisten čállá maid Liv Inger Somby birra gii maid barggai NRK Sámis.

Son muitala maid dovdan eahpevuoiggalaš vásáhusaid go dáčča biddjui ráhkadit dokumentára Elsa Laula Renberg birra, ovdalii go Somby geas lei nana máhttu fáttás.

Somby bargagođii masterbargguin, ja válddii virgelobi journalistabarggus.

Son maid válljii heaitit barggustis maŋŋel virgelobi, go dovddai ahte su gelbbolašvuođas ii lean árvu.

Direktevra šálloša

NRK Sápmi direktevra Mona Solbakk šálloša jus ovttasge leat heajos vásáhusat NRK Sámiin.

– Mii addit daid virgelobiid maid lágalaččat fertet addit. Das viidáseappot lea váldočuokkis ahte mii eat atte virgelobiid. Juohke bargi lea friddja ieš mearridit guđe bargoaddi ovddas háliida bargat. Dáin dáhpáhusain leaba goappašagat válljen cealkit eret bargguid NRK:s, muitala Solbakk Journalistenii.