Ambulánsabargit ledje arvat ovdal báikkis, muhto eai beassan dahkat maide go politiijat nu ádjánedje.
Ambulánsabargit vurde badjel 40 minuhta dan botta go Islándda Gisli Thor Thorarinsson jámii go varra nogai Donjevuonas Finnmárkkus maŋŋel go lei bážahallan čoarbbeallái.
Son bážahalai ja goddui Donjevuonas cuoŋománu 27. beaivvi. Obdukšuvdnaraporta čájeha ahte son jámii maŋŋel go bážahalai čoarbbeallái iežas vielljabeales, čállá NRK.
Eai ollen nu jođánit
Politiijaid operašuvdnaguovddážii bođii diehtu dii. 05:25.
Politiijat ádjánedje 53 minuhta boahtit, eai ge ollen ovdal go dii. 06:18.
– 53 minuhta, lea go dat doarvái buorre?
– Dál lea nu ahte mis eai sáhte politiijat juohke sajis álo. Dát váktaortnet mearragáttis lea mis leamaš olu jagiid. Dat áigi lea siskkobealde dan maid politiijat ožžot ádjánit, vástida Finnmárkku politiijaguovllu njunušgoddehoavda, Tarjei Sirma-Tellefsen NRK:i.
Lassin dan 53 minuhttii boahtá vel áigi maid ádjánit iskat báikki.
Danne manai birrasii diibmu dan rájes alárbma manai, dassái go ambulánsabargit besse vissui gos Gisli Thor Thorarinsson veallái.
Vurde
Ambulánsabargit ledje arvat ovdal báikkis, muhto dilálašvuođain, go lea hupmu veahkaválddálašvuođas ja vearjjuin, de fertejit ambulánsabargit vuordit mannamis sisa ovdal go politiijat leat leamaš báikkis.
Go goddin dáhpáhuvai Donjevuonas, de vulge politiijat Gilivuonas mii lea diibmobeali eret. Ambulánsabargit vurde danne badjel 40 minuhta ahte politiijat galge joavdat, olggobealde viesu. Easka de besse addit heahteveahki, muhto de ii lean heagga šat gádjumis.
– Go diehtá ahte doppe siste lea olmmoš gii dárbbaha medisiinnalaš veahki gii lea jápmime, de dat dieđusge lea hui moarahahtti, dadjá ambulánsasearvvi jođiheaddji, Ola Yttre.
Son oaivvilda ahte lagaspolitiijarefoarbma lea dagahan ahte ambulánsabargit fertejit vuordit guhkit ráđđeaddima politiijain.
– Muhtumin bohtet politiijat ovddemus, muhtumin fas dearvvašvuohta ja muhtumin boahtá buollin. Nu dat lea. Dán háve dađi bahábut ii mannan bures, dan fertet beare šállošit, dadjá Sirma-Tellefsen.
Ambulánsabargiid mearrádus
– Ahte ambulánsa leat válljen vuordit politiijaid ovdal go manne vissui, lea mearrádus maid dearvvašvuođalágádus ieža leat váldán, dadjá Sirma-Tellefsen.
– Mearrádusa man ambulánsa vállje dahkat, ferte dearvvašvuođalágádus vástidit. Politiijain, geain lei vákta, ledje Gilivuonas ja ožžo dieđu ahte galget vajot vuoddját, dadjá Sirma-Tellefsen.
