-Almmuhus-
OĐĐASATAmbulánsa stuorimus gollun Davvi-Norggas

Ambulánsa stuorimus gollun Davvi-Norggas

-

-

Dearvvašvuođafitnodagat golahedje 6 miljárdda ambulánsabálvalussii diibmá. Riikaosiid gaskkas leat stuora erohusat, sihke goluid ja bálvalusaid ektui.

Ollugat orrot guhkkin eret buohcciviesus, ja doaibmi ambulánsabálvalusat leat dehálaččat vai álbmogis lea dohkálaš dearvvašvuođabálvalus beroškeahttá gos orrot, čállá Statistihkalaš Guovddášdoaimmahat.

 

Eanemus gollu Davvi-Norggas

Ambulánsabálvalus máksá birrasii 1150 ruvnno juohke ássi nammii, muhto leat stuora erohusat dan njealji dearvvašvuođaguovllu gaskkas. Guhkes gaskkat, ássit viidát Norggas ja dálkkádatlaš bealit sáhttet dagahit stuorámus erohusaid.

Davvi-Norggas máksá buot eanemus juohke ássi ovddas Lulli-Nuorta Dearvvašvuođa ektui. Davvin geavahuvvui girdiambulánsa 9 proseantta buot gohččumiin, ja Lulli-Nuortta bealis lei dát lohku 1 proseantta, čájehit Statistihkalaš Guovddášdoaimmahaga logut.

 

Eanemus alit čuovggat ja sirenat Lulli-Nuorttas

2016:s ledje measta 700 000 ambulánsamátkki Norggas. Gohččumiid sirrejit heađi ektui, ja heađi juogus leat maid erohusat riikkaosiid gaskkas.

Heahtegohččumat Lulli-Nuorta Dearvvašvuođas ledje 37 proseantta ja Davvi Dearvvašvuođas fas 26 proseantta.

 

Guhkimus gaskkat davvin

Oktiibuot vudje ambulánssat 3,3 miljovnna miilla 2016:s. Davvi Dearvvašvuođas vudje birrasii čieža miilla juohke háve go gohččojuvvojedje mátkái, ja Lulli-Nuorta Dearvvašvuođas lei dát lohku badjelaš njeallje miilla.

Go heakka gádjumis lea sáhka, de eai veahket alit čuovggat ja sirenat jođánet ollet buohccivissui dan dihte go gaskkat leat guhkit. Ollu báikkiin Norggas lea girdiambulánsa áidna molssaeaktu heahtedilis, čállá Statistihkalaš Guovddášdoaimmahat.

-Almmuhus-